C- Nuhu, amincin Allah ya tabbata a gare shi:

Kuma akwai karni goma tsakaninsa da Adam, sai Allah ya aiko shi zuwa ga mutanensa bayan sun bata kuma suka bauta wa wanin Allah, Sun bauta wa gumaka, duwatsu, da kaburbura, kuma daga cikin mashahuran “gumakan” su akwai Wad, Suwa ‘, Yaghuth, Yauk, da Nasr, saboda haka Allah ya aike shi zuwa gare su don mayar da su ga bautar Allah shi kaɗai, kamar yadda Allah Madaukaki ya gaya mana cewa:

Lalle ne, haƙĩƙa Mun aika Nũhu zuwa ga mutãnẽnsa, sai ya ce: “Yã mutãnẽna! Ku bauta wa Allah! Bã ku da wani abin bautãwa waninSa. Lalle ne nĩ, inã jimuku tsõron azãbar wani Yini mai girma.”

Al-a’araf: 59

Ya ci gaba da kiran mutanensa zuwa ga bautar Allah na tsawon lokaci, kuma kadan ne kawai suka yi imani tare da shi, don haka ya kira Ubangijinsa, yana cewa:

(Annabi Nũhu) ya ce: “Ya Ubangijina! Lalle ne, na kirãyi mutãnena, a cikin dare da yini.”

“To, amma kirana bai ƙãre su ba sai da, gudu (daga gare ni).”

“Kuma lalle ne ni, kõ da yaushe na kirãye su dõmin Ka gãfarta musu, sai su sanya yatsunsu a cikin kunnuwansu, su lulluɓe da tufãfinsu, su dõge ga yin laifi. Sun yi girman kai iyãkar girman kai.”

“Sannan lalle ne ni, na kira su, a bayyane.”

“Sannan lalle ne, na yi yẽkuwa sabõda su, kuma na gãna da su a cikin asĩri.”

“Sai na ce, ‘Ku nẽmi gãfara daga Ubangijinku, lalle ne shi Ya kasance Mai gãfara ne.”

“Ya sako (girgijen) sama a kanku da ruwa mai ɓuɓɓuga.”

“Kuma ya yalwata muku game da dũkiya da ɗiya, Ya sanya muku (albarka) ga gõnaki, kuma Ya sanya muku koguna.”

“Me ya sãme ku, bã ku fãtar sãmun natsuwa daga Allah,”

“Alhãli kuwa, lalle ne, Ya halitta ku, a cikin hãlãye?”

Suratu Nuh: 5-14

Duk da irin wannan kokarin da suka yi na ci gaba da nuna matukar son shiryar ga mutanensa, sai suka karyata shi kuma suka yi masa ba’a suka kuma zarge shi da Hauka.

Allah ya yi masa Wahayi da cewa

Kuma aka yi wahayi zuwa ga Nũhu cẽwa: Lalle ne bãbu mai yin ĩmãni daga mutãnenka fãce wanda ya riga ya yi ĩmãnin, sabõda haka kada ka yi baƙin ciki da abin da suka kasance sunã aikatãwa.

Hud: 36

Kuma ya umurce shi da ya kera Jirgin ruwa wanda zai dauki duk wanda ya yi imani tare da shi

Kuma Yanã sassaƙa jirgin cikin natsuwa, kuma a kõ yaushe waɗansu shugabanni daga mutãnensa suka wuce ta gabansa, sai su yi izgili gare shi. Ya ce: “Idan kun yi izgili gare mu, to, haƙĩƙa mũ mã zã mu yi izgili gare ku, kamar yadda kuke yin izgili.

“Sannan da sannu zã ku san wanda azãba zã ta zo masa, ta wulakantã shi (a dũniya), kuma wata azãba zaunanna ta sauka a kansa (a Lãhira).”

Har a lõkacin da umurninMu ya je, kuma tandã ta ɓulɓula. Muka ce: “Ka ɗauka, a cikinta, daga kõme, ma’aura biyu, da kuma iyalanka, fãce wanda magana ta gabãta a kansa, da wanda ya yi ĩmãni.” Amma kuma bãbu waɗanda suka yi ĩmãni tãre da shi fãce kaɗan.”

Kuma ya ce: “Ku hau a cikinta, da sũnan Allah magudãnarta da matabbatarta. Lalle ne Ubangijĩna, haƙĩƙa, Mai gãfara ne, Mai jin ƙai.”

Kuma ita tanã gudãna da su a cikin tãguwar ruwa kamar duwãtsu, sai Nũhu ya kirãyi ɗansa alhãli, kuwa ya kasance can wuri mai nĩsa. “Yã ƙaramin ɗãnã! zo ka hau tãre da mu, kuma kada ka kasance tãre da kãfirai!”

Ya ce: “Zan tattara zuwa ga wani dũtse ya tsare ni daga ruwan.” (sai annabi Nũhu) ya ce: “Bãbu mai tsarẽwa a yau daga umurnin Allah fãce wanda Ya yi wa rahama.” Sai taguwar ruwa ta shãmakace a tsakãninsu, sai ya kasance daga waɗanda aka nutsar.

Kuma aka ce: “Yã ƙasa! Ki haɗiye ruwanki, kuma yã sama! Ki kãme.”Kuma aka faƙar da ruwan kuma aka hukunta al’amarin, kuma Jirgin ya daidaita a kan Jũdiyyi, kuma aka ce: “Nĩsa ya tabbata ga mutãne Azzãlumai.”

Kuma Nũhu ya kira Ubangijinsa, sa’an nan ya ce: “Yã Ubangijina! Lalle ne ɗãna na daga iyãlĩna! Kuma haƙĩƙa wa’adinKa gaskiya ne, kuma Kai ne Mafi hukuncin mãsu yin Hukunci.”

Ya ce: “Yã Nũhu! Lalle ne shi bã ya a ciki iyãlanka, lalle ne shĩ, aiki ne wanda ba na ƙwarai ba, sabõda haka kada ka tambaye Ni abin da bã ka da ilmi a kansa. Haƙĩƙa, Nĩ Inã yi maka gargaɗi kada ka kasance daga jãhilai.”

Ya ce: “Yã Ubangijina! Lalle ne nĩ, inã nẽman tsari gare Ka da in tambaye Ka abin da bã ni da wani ilmi a kansa. Idan ba Ka gãfarta mini ba, kuma Ka yi mini rahama, zan kasance daga mãsu Hasãra.”

Aka ce: “Ya Nũhu! Ka sauka da aminci da, a gare Mu da albarka a kanka, kuma rahama ta tabbata a kan waɗansu al’ummõmi daga waɗanda suke tãre da kai. Da waɗansu al’ummõmi da zã Mu jiyar da su dãɗi, sannan kuma azãba mai raɗaɗi ta shafe su daga gare Mu.”

[Hud: 38-48].

About The Author