b- Aarano e nulaaɓe ɓen, ko ben men Aadama:

Allah tagir ben men Aadama e loopal, refti O wutti wonkii kin e makko. Allah daali:

Gomɗii Men tagii on, refti Men mbaadini on, refti Men wi’ani Malaa’ikaaɓe ɓen : “Sujjanee Aadama”, ɓe sujji, si wanaa Ibliisa, o jeyanooka e sujjuɓe ɓen.

O daali : “Ko haɗu-maa sujjugol nde Mi yamir-maa?” O wi’i : “Miɗo ɓuri mo moƴƴude : A tagii lam immorde e Yiite, A tagii mo immorde e loopal”.

O daali : “Jippo ton, haananaama nde mawnintintoɗaa ton. Yaltu, an ko a jeyaaɗo e hoyɓe ɓen”.

[Ibliisa] wi’i : “Nennitanam haa ñalnde ɓe immintintee”.

[Alla] daali : “An, ko a jeyaaɗo e nennitanteeɓe ɓen”.

[ Al-A‘raaf : 10-15].

O ɗaɓɓi nde Allah nennitanta mo haa O tonnga leptugol mo ngol, O duŋanoo mo bewingol Aadamaa e geyngol mun, fii tun ngañanaandi e ngayngu. llah duŋorani mo ñeñƴal ngal O faandorii nde seytaande bewinirta Aadama e gyengol munngol, si wanaa jeyaaɓe Allah laɓɓinaaɓe ɓen. O haɗi Aadama e jurriiya mun jokkugol jebbilanoo seytaane, ɓe wona e moolorgol Allah bone makko. Seytaane fuɗɗii kuuɗe mun ɗen e Aadama e debbo mun on Hawaa (mo Allah tagiri e moodi mun) wano ardi non ka fillayee.

“””Ko an yo Aadama, hoɗu an e ɓeyngu maa ka Aljanna, ñaamee kala nokku ka yiɗu-ɗon ; wata tun on ɓaɗto ngal ɗoo leggal, sakko laatoɗon e tooñooɓe ɓen””.”

Seytaane sowinsini ɓe, fii yo o feññinan ɓe ko suuɗaa e maɓɓe e awraaji maɓɓe, o wi’i : “Joomi mon haɗiraali on ngal leggal si wanaa fii wata on laato Malaa’ika maa laatoɗon duumotooɓe [ka Aljanna]”.

O woondani ɓe o wi’i : “Min ko mi laaɓanooɓe on”.

O hodiri ɓe janfa. Nde ɓe meeɗunoo laggal ngal, awraaji maɓɓe ɗin feeñani ɓe, ɓe waɗti hiɓe surritora kaaki Aljanna ɗin. Joomi maɓɓe noddi ɓe : “E Mi haɗaano on e ngal leggal, Mi wi’ani on : Pellet, seytaane ko gaño mo’on ɓannguɗo?”.

Ɓe wi’idi ɓe ɗiɗo : “Joomi amen, men tooñii ko’e amen. Si A haforanaali men yurmeɗaa men, ma men jeye e sooyuɓe ɓen”.

[Alla] daali : “Jippee (ka leydi), yoga mon ko ayɓe yoga. Hino woodani on ka leydi ton ñiiɓirde e dakamme haa saanga”.

[Alla] Daali : “Ko (ka leydi) ton wuuroton, ko ton kadi maayoton, ko e mayri kadi yaltinoyteɗon”.

Ko onon yo ɓiɗɓe Aadam! Gomɗii Men Jippinii e mo’on conci surrayɗi awraaji mon ɗin e cuɗaari. -Ko cocni kulol ɗin non ɓuri muƴƴude.- Ko ɗum jeyaaɗum e Aayeeje Alla. Belajo’o, kamɓe ɓe waajitoto.

Ko onon yo ɓiɗɓe Aadama! Wata seytaane fitinir on wano o yaltinirnoo baabiraaɓe mon ɓen ka Aljanna, himo ɓoora e maɓɓe conci maɓɓe ɗin fii yo hollu ɓe awraaji maɓɓe ɗin. Pellet, himo reeni on kanko e gorol makko ngol nokku ka on yi’ataa ɓe. Menen Men waɗii seytaaneeji ɗin weldiiɗi ɓen ɓen gomɗintaa.

[Al-A‘raaf: 19-27].

Nde Aadama jippinanoo ka leydi, o arsikaa geɗalɓe, o faatii, refti geyngol makko ngol jokkitii ɓeydagol, ɓe hawri e bewanɗe seytaane ɗen, o tuti e maɓɓe ooñagol e rewugol genaale moƴƴuɓe e baabiraaɓe maɓɓe, ɓe wayliri gomɗinal ngal sirku; Allah immini e maɓɓe nulaaɗo jeyaaɗo e maɓɓe, on woni Nuuhu (yo o his).

About The Author