Annabi Su’aybu:
Refti ɓaawo ɗum, Allah immini e yimɓe Madyana ɓen, musiɗɗo maɓɓe on Su’aybu, ɓaawo nde ɓen kadi majjunoo peewal ngal, jikkuuji bonɗi, e jaggitugol yimɓe, e ɗuytugol etirɗe saakitii hakkunde maɓɓe. Allah humpiti en fii maɓɓe, O daali:
[Men nulii] kadi haa e Madyana, musiɗɗo maɓɓe on Su’aybu, o maaki : “Ko onon yo yimɓe am, rewee Allah. Reweteeɗo alanaa on ko woori Mo. Gomɗii ɓanngannduyee arii on immorde ka Joomi mon. Timminee etirɗe ɗen e manndikke ɗen, wata on ɗuytan yimɓe ɓen piiji maɓɓe ɗin, wata on bonnu ka leydi ɓaawo moƴƴugol ndi. Ko ɗum mooɗon ɓuri on moƴƴannde si on laatike gomɗimɓe”.
Wata on jooɗo e kala laawol, hiɗon kammba, hiɗon fjaddo e laawol Allah ngol ɓen gomɗimɓe Mo, hiɗon ɗaɓɓana ngol ooñaare. Annditee tuma nde wonnoɗon seeɗaaɓe O ɗuɗɗini on. Ndaaree ko honno battane bonnooɓe ɓen laatornoo.
Si wonii fedde e mooɗon gomɗinii kon ko nuliraa e mun, fedde goo gomɗinaali, muññee haa Alla ñaawa hakkunde me’en. Ko Kanko ɓuri moƴƴude e ñaawooɓe ɓen.
Mbatu mawnintiniingu e yimɓe makko ɓen wi’i : “Ko maa men yaltine an Su’aybu, e ɓen gomɗimɓe wonndude e maaɗa ka saare amen, maa arton e diina amen kan”. -O maaki : “Hay si tawii ko men añuɓe [ɗum]?”.
Gomɗii (haray) men fefindike e hoore Alla fenaande si men ruttike e diina mon ɓaawo nde Alla daɗndi men e makka. Alanaa men nde men ruttoo e makka si wanaa nde Alla Joomi amen muuyi. Joomi amen yaajanii kala huunde Anndal. Ko e Alla men fawii. Joomi amen, ñaawir hakkunde amen e yimɓe amen ɓen goonga, ko An woni ɓurɗo moƴƴude e ñaawooɓe ɓen”.
Mbatu ɓen yedduɓe e yimɓe makko ɓen wi’i : “Pellet, si on jokkii Su’aybu, onon ontuma ko on hayruɓe”.
Dillaango ngon nanngi ɓe, ɓe waɗtini ka koɗooli maɓɓe ko ɓe jicciiɓe.
Ɓen fennunooɓe Su’aybu, (ɓe halkorino) wa si ɓe meeɗaa wuurude e ngon [hoɗo]. Ɓen fennunooɓe Su’aybu, ɓe laatino kamɓe woni hayruɓe ɓen.
O ɗuurnii ɓe, o maaki : “Ko onon yo yimɓe am, gomɗii mi yottinii e mo’on Nule Joomi am ɗen mi laaɓanii on (reedu). E ko honno mi sunortoo e yimɓe yedduɓe?!”.
[Al-A’raaf : 85-93].
About The Author
