Annabi Saalih:
Reti dumunna kadi yawti, gorol Samuuda ngol mawniri rewo leydi Aarabu ndin, ɓen kadi majjiri no ɓeya majjirnoo. Allah nuli e maɓɓe Saalih jeyaaɗo e maɓɓe, O semmbiniri mo maandeeji tinndinayɗi goongungol makko; ɗin woni ngelooba mawnumba, mba sugu mun alaa e tagu ngun. Allah humpitiri en ɗum e daalol makko:
[Men nulii] kadi haa e Samuuda’en, musiɗɗo maɓɓe on Saalih, o maaki : “Ko onon yo yimɓe am, rewee Allah. Reweteeɗo alanaa on ko woori Mo. Gomɗii arii on ɓanngannduyee immorde ka Joomi mon : mbaa ko ngelooba Allah maande wonannde on, tertee mba ñaama ka leydi Allah, wata on memir mba bone sakko lette muusuɗe nanngata on”.
Annditee tuma nde O waɗunoo on lontiiɓe Aadinkooɓe ɓen, O weerni on ka leydi hiɗon jogitoo e ndantaaji mayri kuɓeeje, hiɗon lesa pelle (waɗon) cuuɗi. Annditee neemaaji Allah ɗin, wata on ɓurtinir ka leydi ko on bonnooɓe.
Hooreeɓe mbatu mawnintiniiɓe ɓen e yimɓe makko ɓen wi’ani gomɗimɓe lo’inaaɓe ɓen e maɓɓe : “E hiɗon anndi wonnde Saalihu ko Nulaaɗo immorde ka Joomi makko?” Ɓe wi’i : Menen ko men gomɗimɓe ko o Nulidaa e mun kon”.
Ɓen mawnintiniiɓe wi’i : “Menen, kon ko gomɗinɗon, ko men yedduɓe ɗum”.
Ɓe borii ngelooba ndewa mban, ɓe mawnintinii gaay e yamiroore Joomi maɓɓe nden, ɓe wi’i : “Ko an yo Saalihu, addan men kon ko foduɗaa men (e lette) si tawii ko a jeyaaɗo e Nulaaɓe ɓen”.
Dillaango ngon nanngi ɓe, ɓe waɗtini ka koɗooli maɓɓe ko ɓe jicciiɓe-ɗaanii.
O runtiii ɓe o maaki : “Ko onon yo yimɓe am, gomɗii mi yottinii e mon Nulal Joomi am ngal mi laaɓanii on (reedu), kono, on yiɗaa laaɓooɓe (reedu) ɓen.
[Al-A’raaf : 73-79].
Allah nuli kadi ɓaawo ɗum, Nulaaɓe ɗuuɗuɓe, faade e yimɓe leydi ndin. Alaa mofte ɗe heɓaali jertinoowo. Allah humpitii en fii woɗɓe e maɓɓe, O acci ɗon fii ɗuuɗuɓe e maɓɓe. Ɓe fow maɓɓe non ko nulal gootal ngal ɓe nulanoo; woni yamirgol yimɓe ɓen rewugol Allah tun, hara kafidaali Mo e goɗɗum, bonnita kala ko woni rewugol ko woori Allah. Allah daali:
Gomɗii Men imminii Nulaaɗo e kala mofte, wonnde rewee Allah, woɗɗitoɗon bewinayɗi ɗin. Hino e maɓɓe on Mo Allah fewni, hino e maɓɓe kadi on mo majjere nden jojji e mun. Yiilee ka leydi, ndaaron ko honno battane fennooɓe ɓen wa’unoo.
[An-Nahl : 36].
About The Author
