2- Muhammadu ko nulaaɗo Allah:
Gomɗingol nulal Muhammadu ngal, ko tugala ɗiɗmal ngal ka tugaale lislaamu, ko e maggal woni ko binndeere lislaamu nden mahotoo.
Neɗɗo no silmira seedagol mo wonnde reweteeɗo tanaa Allaahu alaa, e wonnde ko e Makko Muhammadu nanngi nulal.
a – ko firti wonnde nulaaɗo? ko hommbo woni Muhammadu? hara nulaaɓe goo no adinoo mo?
Ko ɗum etotoɗen jaabagol e ɗii ɗeri ɗoo.
Nulaaɗo: ko gorko hattuɗo goongunde e moƴƴude jikku, mo Allah suɓantoo yimɓe ɓen, O wahayina e makko ko O yiɗi e fiyakuuji diina maa wirniiɗi, hooti O yamiree yottingol e yimɓe ɓen. Nulaaɗo ko ɓanndike nanndo kala ɓanndinke; o ñaamay o yariray wano maɓɓe, himo hatonjina e kala ko ɓe hatonjiŋta. Si wanaa tun, himo heertorii wahayu Allah mo o ƴelliŋtnitirta mo kala ko O muuyi e wirniiɗi maa fiyakuuji diina ɗi o yottinŋta e yimɓe ɓen, himo seerti e maɓɓe ndenka Allah kan e makko fii haɗugol mo yanugol e junuubi mawɗi maa kala ko jiiɓitata yottingol nulal Allah ngal e yimɓe ɓen.
En filloto yoga e peƴƴi nulaaɓe adinooɓe Muhammad jom kisiyee, fii no ɓannginiren wonnde nulal maɓɓe ngal ko gootal, ngal woni noddugol faade e dewal Allah tun. Fuɗɗoren fillayee Baaba Aadaama e ngaygu seytaane ngun hoore makko e geyngol makko.
About The Author
