I-Tẽn-tʋʋma a Muusa tɩlgr be a yĩnga:

Rẽ poorẽ, naab sẽn yaa maan-n-zʋʋg soaba, n yaa waoog-m-meng soaba n puk Misrɑ (Ezipti) , tɩ b boond-a t’a Fɩrão, n yet tɩ yẽ yaa Soaba, lɑ ɑ sagl nebã tɩ b tũ-a la a kodgd a sẽn tʋll a soab nebɑ pʋgẽ la a wẽgd a sẽn tʋll a soaba, tɩ Wẽnd kõ tõnd a kibare, ne A sẽn yeele:

(Ad a Farão zẽka a meng tẽngã pʋgẽ, n weel tẽngã rãmbã, n mɑɑn b sãndɑ tɩ b yɑɑ valemse, ɑ kootɑ b komdibli wã la a basd b kam-pugli wã vɩɩse, ad a yɩɩme n yɑɑ sãamdbã yembre*

tɩ Tõnd tʋll n na n maan neb nins b sẽn valems tẽngã pʋgã neere,lɑ D maan tɩ b lebg sɩd taoor rãmba, la D maan tɩ yaa bãmb la faad rɩkdbã.

La D kõ-b pãnga tẽng gãngã zugu, la D wĩnig a Fɩr-ʿaoon la a Ḥaamaana la b yiibã tãb-biisã b sẽn da yɩ n yaεεsdẽ wã.

La Tõnd leemsɑ ɑ Musa ma wã: ” t’ɑ yẽsm-a la f sã n yεεsd a zugu, bɩ f rɩk-a n ning kʋlgã pʋga, la f ra yεεs ye, la ra sãam f sũur ye, ad Tõnd na n lebs-ɑ lɑ fo nengẽ la D mɑɑn-ɑ t’a yɩ Tẽn-tʋʋma [1]*

T’a Faɩrão zakã rãmb rɩk-a t’a nɑ n wzɑ yɩ b bε la b sũ-sãanga, ad a Fɩr-aoon la a haamaana la b yiibã tãb-biisã b yɩɩ tudgba.*

ta Fɩr-ʿaoon paga yeele:” ad a na n yɩɩ nin-maagr n kõ maam ne foom, ra kʋ-a ye, tɩ tõe t’a wa naf tõndo maa d rɩk-a t’a yɩ d biiga”. La b ra ka mi b yellã baasg sẽn nɑ n yɩ wã ye.*

T’a Musa ma wã pεlgã lebg vɩoogo rẽndɑ ɑ yellã bɑlɑ, kellẽ lɑ bilf t’a vẽnegẽ yellã, sã n ka Tõnd sẽn keng a sũurã sẽn na yɩl t’a yɩ sɩd-kõta.*

La a yeel a Musa tão wã: “pʋg-a n gese”. ta a gεt-ɑ yɩɩgɑ, tɩ b ka ning b yɑme tɩ yɑɑ tão ye.*

Lɑ Tõnd rɑ reng n gɩdg-ɑ lɑme n yi pagb a taabã yẽsengo, tɑ tão yeel-bɑ: ” m wĩnig-y zak rãmb sẽn na n zã-ɑ n kõ-yã la b leb n nɑ n mɑɑn pʋ-beelem ne-a”?*

Tɩ Tõnd nɑ n lebs-a a ma wã nengẽ, sẽn na yɩl t’a nifã mɑɑge la a ra sãam a sũur ye, la a bãng tɩ Wẽnd pʋlengã yaa sɩda, la ɑd nebã wʋsg fãa ka mi ye.*

La a sẽn wa n ta a keelem wɑkto Tõnd kõ-a la Bʋʋd minim la bãngre, la yaa woto bɑl la Tõnd rond nin-sõmsã.*

La a Mʋsɑ kẽ tẽngã pʋgẽ, b yam yaal-yaal wakato, n mik roap a yiib sẽn zabd taaba, a yembrã yaa yẽnda buudã neda, la a to wã yaa yẽnda bεεbã nedɑ, tɩ ned ning sẽn yaa a buudã nedã bao t’a sõng-ɑ tɩ b zab ne b bε wã, t’a Musa na n toaag-a t’a vik n lʋɩ n ki. La a [Musa] yeel-yã: ” ad woto yaa a Sʋɩtãan soosgo, ad a yaa bε, n yaa menesd tɩ yaa vẽenega”.*

t’a yeele: ” M Soaba Wẽnde, ad mam wẽga m menga, bɩ f yaaf-ma. Tɩ Wẽnd na n yaaf-a, Ad A yaa yaafg naaba n yaa yolsg naaba.*

La a yeel-yã: “M Soaba Wẽnde, ad Fo sẽn maan maam neemã wã, m kõn n leb n song nin-wẽnsã ye”.*

tɑ be tẽngã pʋgẽ n lebg yaεεsdɑ n gũusd sẽn nɑ n yɩlɑ, la ned ning sẽn kos-yẽ sõngr zaamẽ wã mõond-ɑ t’a wa sõng-a, la a Musa yeel-ɑ:” ad fo yaa zab kεdgd tɩ yɑɑ n vẽnege”.*

La a sẽn wa n rat n wẽbg ned ning sẽn yaa b yiibã bε wã, la a [Musa nedã yaεεs n yeele: ” Muusa, fo rat n kʋʋ maam wala fo sẽn kʋ yõor zaamẽ wã? Fo pa tʋll baa fʋɩ rẽnda fo na yɩ bi-bεεg bɑlɑ tẽng gãngã zugu, fo pa rat n yɩ pɑɑsd ye”.*

Tɩ rao yɩ tẽngã yaanga n yãgdẽ, ɑ wɑ n yeelɑme: ” Muusa, ad kug-zĩidbã rɩkdɑ noore n rɑt n wa kʋ foom, bɩ f yi tẽngã, ad mam mɑɑnd-f lɑ pʋ-peelem”.*

T’ɑ yi tẽngẽ wã n yεεsdẽ n lɑmsdẽ n pɑ mi sẽn nɑ n yɩ ye, ɑ yeelɑme: “M Soaba tɩlg maam n yi wẽgdbã*

La sẽn wɑ n toglg Madyan sẽnẽ wã, a yeelame: ” tõe tɩ m Soabã peeg mɑɑm n tʋg so-tɩrga”*

La a sẽn wɑ n ta Madyan koomẽ (kʋlgẽ) wã, a mika zãma tɩ yũnugd b rũmsi, la a mik pagb a yiib sẽn lak n tɩ be kεεnga n gɩdgd b rũmsã. t’ɑ yeele: ” yãmb yellã yɑɑ wãn-wãnɑ tɩ y pɑ yũnigdẽ?” tɩ b yiibã yeele: ” ad tõnd pa yũnugd rũmsã hɑlɩ tɩ rũm-kɩɩmbã wɑ looge, la tõnd saambã me yaa nin-kẽem kʋʋdre”*

T’a yũnug n kõ b yiibã, rẽ poorẽ t’a kẽng maasmẽ wã, n yeele: ” m Soaba! Ad Fo sẽn sɩk bũmb ning n kõ mɑɑm sẽn yɑɑ sõmɑ fãɑ m tʋllɑme” *

Tɩ b a yiibã yembr wa a nengẽ n kẽnd ne yãn-zoεεga, n tɩ yeele: ” ad m saamb boonda foom n na rol foo fo sẽn yũnug tõnd rũmsã keoore, la a Musa sẽn wa n ta b sɑɑmbã nengẽ wã, n togs-a ɑ kibay wã, la ɑ yeel-ɑ: ” ra yaεεs ye, ɑd fo põsɑ ɑ Fɩrɑoon-rãmb sẽn yɑɑ wẽgdbã” *

La b yiibã yembr yeel-yã: ” M saamba, rɩk-a tɑ gũud tõnd rũmsã, ad ned sõmblem sẽn yɩɩd fo sẽn nɑ n dɩk tʋʋmɑ, yɑɑ pãng soɑbã sẽn yaa bas-m-yam soabã” *

T’a yeele: “mam rat n rɩka m koam-pugli a yiibã yembre n fur n kõ foom, la furã ligdi yaa tɩ fo tʋm mam nengẽ yʋʋm a nii, la fo sã n pids yʋʋm piiga rẽ yɑɑ fo mɑɑn neere , mam pa rat n nɑ n weoog foom ye, Wẽnd sã n sake, fo na n muka maam tɩ m yaa nin-sõngo *

T’ɑ Muusɑ yeele: ” tõnd sẽn zemes tɑɑbã yaa maam ne foom sʋka, wakat ɑ yiibã yembr mam sẽn wa n mɑɑn-ɑ, beem ka be maam zug ye, la Wẽnd la sεεtɑ ne tõnd sẽn yetã” *

La a Musa sẽn wa n pids yʋʋmã yiibã, n loog ne a zakã rãmbã n nɑ n leb Mĩrɑ, a yãɑ bugum tãngã kɩrengɑ, t’a yeel a zɑkɑ rãmbɑ: ” mɑm yãnda bugum, rɑɑr bɩ m pɑɑm kɩbɑr beene n wa, maa m pɑɑm bug-vɩlengɑ tɩ sãnd-sãnde y nɑ paam n woode. *

Lɑ ɑ sẽn wa n ta-a wã la B bool-ɑ ko-soogã rɩtg wεεngẽ, zĩig ning sẽn yaa barkã, tɩɩgẽ wã: ” n yeel tɩ Musa, ad yaa Maam la Wẽnde, sẽn yɑɑ bõn-naandã Soabã *

La “lobg f rasaarã”. La a sẽn wa n yã-a t’a rãmbdẽ tɩ yɑɑ wala waafã, a lebg n zoeeme, ɑ pɑ lebgd ye. T’ɑ yeel-ɑ Muusa, lebg n tʋglg la f ra yεεs-ɑ ye, ad fo be bas-m-yam pʋgẽ *

Rɩk f nugã n suy f loorẽ wã, t’a na n yiie n yɑɑ pεεlga, tɩ pa Sẽer ye. La f rɩk f nugã n pẽ f yãogã tɩ yεεsã sɑ.rẽnd rẽndɑ yaa tɑgmɑs a yiibu sẽn windi, tɩ yi fo Soɑbã nengẽ n tʋm tɩ f kẽng ne a Fɩr-ʿaoon la a kug-zĩidbã nengẽ, ad b ra yɩɩme n yaa dĩin-yitbɑ *

La a yeele: ” yaa m Soaba, ad mam kʋʋ b ned a yembre, rẽnd mam yaεεsdame tɩ b na n wa kʋ maam *

La mam ma-biig a Haarʋʋnɑ yẽndɑ yɩɩda maam ne zelem pεka, bɩ F tʋms-a n naag maam t’a sõngd maam la a sɩdgd maam, ad m yεεsda b na n wa yags maam” *

T’A yeele: ” D na n kenga f pãngã ne f ma-biigã, la D maan wilb tɑgmse n kõ yãmba tɩ b ka tõe n mɑɑn yãmb wẽng ye, sẽn tũ ne Tõnd tagmas-rãmbã, yãmb y yiibã la neb nins sẽn pʋg yãmbã n na n wili.)

[Alƙaṣaṣ 4-35]

[1] a ma wã ning-a la koglogã pʋgẽ n sɑgl-a kʋlgẽ wã.

T’a Muusa ne a ma-biigã kẽng a Farão nengẽ – nɑɑb sẽn yɑɑ waoog-m-meng soɑbã- tɩ b bool-a n tʋg bõn-naandsã Naabã tũudum.

(La a Farão yeel-yã: ” yaa bʋg la bõn-naansã Soaba?”*

T’a a Muusa yeele: ” saas la tẽnga la bũmb nins sẽn be b yiibã sʋg Soabã, tɩ yãmb sã n yɩɩme n yaa bãng-n-wãag rãmba”.*

La a Farão yeel neb nins sẽn gʋbgã wã: ” y pɑ wʋmde?”*

Ta a Muusa yeele: ” A yaa yãmb Soabã la yãmb bɑ-rãmb sẽn deng tɑoorã Soabɑ”.*

Ta a Farão yeele: “ad y tẽn-tʋʋm ning b sẽn tʋms tɩ wa yãmb nengẽ wã yaa gãeenga”.*

Ta a Musa yeele: “A yaa wĩntoog saen pukdẽ la sẽn lʋtẽ lɑ bũmb ning sẽn be b yiibã sʋkã Soaba, tɩ yãmb sã n tara yam n tagsdẽ n getẽ*

La a Fɩr-ʿaoon yeel-yã: ” la tɩ fo sã n tũ soabɑ zẽng sẽn ka maam, m na pag-f bãense*

Ta a Musa yeele:” bɑ tɩ mam sã n wa ne bũmb sẽn sɩdgd-m tɩ yɑɑ vẽenegɑ?”*

La a [Farão] yeel-yã: ” bɩ f wa ne-a sã n mikame tɩ fo yaa sɩd soaba”.*

T’a lobg a rasaarã t’a lebg waaf tɩ yɑɑ vẽenega.*

La a yiis ɑ nugã, t’ɑ yɑɑ pεεlg tɩ b getẽ.*

La a [Farão] yeel kug-zĩidb nins sẽn be yẽ kɩrengã:” ad yã wã yaa tɩɩm soɑbɑ sẽn yɑɑ mita,*

A rat n yiisɑ yãmb y tẽngẽ wã ne a tɩʋmã, la yãmb sagenda maam ne bõe?”*

La b yeel yã: ” yɑool-ɑ ne ɑ mɑ-biigã, la f tʋms tẽm-pεdã pʋsẽ tɩ b tigim nebã n mõone*

Tɩ b wɑtɑ fo nengẽ ne tɩɩm soɑb fãɑ sẽn yɑɑ mitɑ”.*

Tɩ b tigim tɩtã rãmbɑ raar ning sεk b sẽn mi ɑ rɑɑrã yĩngɑ*

Tɩ b yeel nebã:” rẽ yĩngã yãmb tigimɑ me*

Sãnd-sãnde d nɑ tũ tɩtɑ rãmbɑ tɩ sã mik tɩ yɑɑ bãmb n tõoge?”*

la tɩtã rãmb sẽn wa n wa wã, b yeela a Fɩr-aoona: ” rẽ yĩngã tõnd tara keoore tɩ tõnd sã n mik tɩ yɑɑ tõnd n tõoge?”*

La yeel tɩ: ” n-ye, lɑ ɑd yãmb wɑkɑt kãngɑ y lebga mam pẽt-n-tɑɑse*

T’a Muusa yeel-ba: ” lob-y bũmb nins yãmb sẽn na n lobã”.*

Tɩ b lob b wĩyã la rasapã n yeele: ” ne a Fɩr-aoon zɩslemã, ɑd yaa tõnd bɑl lɑ windbã”.*

T’a Muusa lobg a rasaarã t’a na n vel bãmb sẽn maanã*

Tɩ tɩtã rãmb lʋɩ n maan suguudu*

N yeele: ” D kõo sɩd ne bon-naandsã Soabã,*

a Muusa ne a Harʋʋn Soabã”.*

La a [Farão] yeel-yã: “yãmb kõ sɩd ne-ɑ taoor tɩ mam ka kõ yãmb sore? Ad yaa yẽnda la yãmb kãsem ning sẽn kɑrmɑ yãmb tɩɩmã, lɑ y na bãnge, m na n (kɩtame tɩ b) kʋʋs y nusã la y nao wã lεdm-lεdm, lɑ m nɑ n sãrɑ y fãa gilli”.*

La b yeel-yã: ” yẽ kɑ yel ye! Ad tõnd yɑɑ d Soabã nengẽ la d lebda.*

Ad tõnd tara tʋlsem t’A yaaf tõnd tʋʋm-tuutsã tõnd sẽn yɩ rẽenem sɩd kõtbã yĩngɑ.*

La Tõnd tʋmɑ wahɩ tɩ kẽng a Musa nengẽ [n yeel-a] : ” yi ne Mɑm yembsã yʋngo, ad yãmb yɑɑ b sẽn na n pʋgl b rãmbɑ”.*

T’a Fɩrão tʋms tẽm-pεdã pʋsẽ tɩ b tigim n mõon n yeel*

“””Ad bãmbã yaa zãmɑ-kɑr-kɑre sẽn yɑɑ bilfu*”

la ad b puuga tõnd sũyã*

tɩ tõnd fãa gill yɑɑ sẽn sogle*

Tɩ Tõnd yiis-b pʋtẽ wã la ko-ninẽ.*

La arzεksẽ la zĩ-waglẽ*

Yaa woto bɑlɑ lɑ Tõnd rɩk ɑ faadã n kõ a ɭsraεεl koambã.*

Tɩ bãmb na n pʋg-b wĩntoog pukr wakato.*

Lɑ wɑkat ning zãma a yiibã sẽn wa n yãnd taaba, a Muusa nebã yeelame: “ad b na n paama tõndo”.*

La a yeel-yã: ” pɑ woto ye, ad mam Soabã bee ne maam, A na n peegɑ maam”.*

Tɩ Tõnd na n tʋms wahɩ tɩ kẽng a Muusa nengẽ: ” wẽ mogrã ne f rɑsɑɑrã”. T’a pãrg n maan gεεmɑ tɩ lebg soy tɩ geemd ɑ ye fãa lebg wala tãn-bedre.*

Lɑ D pẽneg neb ɑ taabã [a Fɩarão ne a nebã]*

Lɑ D tɩlg a Muusa ne neb nins sẽn naag-a wã fãa gilli*

Rẽ poorẽ tɩ D bõr neb a taabã*

Ad tagmas be rẽ pʋgẽ la b wʋsgã fãa pa yi n yɑɑ sɩd-kõt-b ye.*

La ad fo Soabã yaa Yẽ lɑ wilb naabã n yaa yolsg naabã)

[Aššʋ’ʿaraa’ʋ: 23-67].

La bõrbã sẽn wa n paam a Farãonɑ , a yeelame tɩ yẽ kõo sɩda tɩ soab sẽn tũud n tɩlg ka be rẽnda ɭsraεεl koambã sẽn kõ sɩd ne-A wã, wẽnd yeelɑme, A Naam zẽkame:

[Wẽnd yeele]: moasã? Tɩ fo yaool n da tõdga pĩndã la f le yɩ n naag sãamdbã!

Rẽnd rũndã Tõnd na n yiisa fo yĩngã sẽn na yɩl tɩ fo lebg tagmase ne neb nins sẽn wat fo poorẽ wã. La baa ne rẽ fãa, ad nebã wʋsg maanda yam yaal-yaale n yit Tõnd tagmasã) [Yuunus 91, 92]

Tɩ Wẽnd rɩk faad n kõ a (Muusa nebã) -b sẽn da yɩ n valemsd-b rãmbã- wĩntoogã sẽn pukdẽ la a sẽn lʋɩtẽ wã sẽn yaa A sẽn barkã, la A wõr a Farãon ne ɑ nebã sẽn da maandã , lɑ b sẽn da yɩ n met tɩ zẽkdẽ wã.

La Wẽnd sika rẽ poorẽ, n kõ a Muusa Gaf sẽn yaa Taooraate, tɩ kãndagr be a pʋgẽ ne nebã la vẽenem, n peegd-bɑ n tʋg bũmb ning Wẽnd sẽn nong la A yardẽ, leb n be a pʋgẽ sẽn yaa Halaale la haraam welsgo, sẽn yaa tɩlae ne a ɭsraεεl koambã (a Muusa nebã) tɩ b tũ-a

Rẽ poorẽ, a Muusa maana kaalem, tɩlgr be a yĩnga, tɩ wẽnd tʋms yẽ loogr poorẽ nabiyaam-rãmb wʋsgo n tʋg ɭsraεεl kaombẽ, tɩ b pεεgd-b n tʋgd so-sõmbsẽ, nabiyaam sẽn maan kaalem fãa la nabiyaam a to sẽn let a zĩigẽ.

Wẽnd togsa tõnd b sãnda kibare, wala a Daawʋʋda la a Sʋlaymaane la a Ayyʋʋba la a Zakarɩya, la A pa togs tõnd b wʋsg kibae ye, rẽ poorẽ A pidsa tẽn-tʋʋm kãnsã ne a Isa a Maryam biiga tɩlgr be a yĩnga, ning vɩɩmã sẽn pid ne yel-soalem-rãmba, sẽn na n sɩng a rogmẽ wã n na n tɩ tãag b sẽn na n zẽk-a n tʋg saasẽ wã.

Taooraat ning Wẽnd sẽn sik n kõ a Muusã wã keedgo la toeeng wʋsgo paam-a lame, sẽn tũ ne Yahuud-rãmbã nusẽ, sẽn yagsdb tɩ bãmb yaa a Muusa pʋgdba tɩlgr be ɑ yĩngɑ, t’a Muusa yaool n yaa sẽn zãag n yi bãmbã, la Taooraat ning sẽn be bãmb nusẽ wã, pa yẽnda la taooraat ning sẽn sig n yi Wẽnd nengẽ wã ye, bala b kẽes a pʋgẽ, bũmb sẽn pa sõmbe n yi Wẽnd nengẽ ye, la b sɩf Wẽnd a pʋgẽ ne sɩf-rãmb sẽn yaa pɑoogre la zɩɩlem la faagre la pãn-komsgo, ad Wẽnd zẽkame n yi bãmbã sẽn yetã, zẽkr tεkẽ, Wẽnd yeelame A Naam zẽk yã, bãmbã sɩfg pʋgẽ.

(rẽnd wɩɩbd be ne sẽn gʋlsd-b Gɑfã ne b nus n yɑool n yetẽ: ” yã wã yii Wẽnd nengẽ”. Sẽn nɑ pɑɑm n koos-ɑ ne ligd bilfu, ɑd wɩɩbd be ne-bɑ, b nusã sẽn gʋlsã, lɑ wɩɩbd be ne-bɑ b sẽn pɑɑmd ɑ pʋgẽ wã)

[Albaƙara: 79].

About The Author