B-Yεl nins sẽn harmã la sẽn gɩdgã
-Pipi: Yaa Šɩrk (Lagem-n-taare) (yaa f sẽn na n wẽnems kõbg sẽn yi tũudumã kõbgẽ n kõ zẽng sẽn ka Wẽnde, A Naam zẽkame)
Wala ned sẽn na n maan suguu ne zẽng sẽn ka Wẽnde, maa a kota zẽng sẽn ka Wẽnde, n baood a nengẽ t’a lok-a a bõn-tʋlsem, maa a kot pẽnegr baoobo zẽng tɩ pa yɩ ne Wẽnde, maa a kõta tũudum sẽn yi tũud-rãmbã pʋgẽ zẽng sẽn ka Wẽnde. zem t’a sẽn kotã kiime maa ɑ vɩɩme, yaa kabre, maa rʋbga maa kugri, maa yaa tɩɩga, maa yaa malεk maa yaa nabiyaama, maa yaa wali maa yaa rũnga, maa zẽng sẽn ka yɩ rẽnda, wãnde fãa yaa lagem-n-taar ning Wẽnd sẽn ka yaafde A yamb zugu, A Naam zẽkame, rẽndame t’a tuubame n leb n yẽbg n kẽ Lɩslaoongã.
Wẽnd yeelame A Naam zẽk yã:
(Ad Wẽnd pɑ bɑsd tɩ loog tɩ b sã n mɑɑn lɑgm-n-tɑɑr ne-A ye, lɑ A yɑɑfdɑ sẽn pɑ tɑ rẽ, ne A sẽn tʋll ɑ soɑbɑ, lɑ sẽn mɑɑndɑ lɑgm-n-tɑɑr ne Wẽnde sɩd lɑ hɑkɩɩkɑ ɑ pɑsgɑ zũnuub sẽn zɩse n doglge)
[Annisaa’ʋ 48].
Rẽnd lɩslaam ka tũudi sã n ka Wẽnde, A Naam yɩ wagelle n zẽke, a ka kote rẽnda Wẽnde, a ka gãnegd a menga rẽnda Wẽnd yĩnga, Wẽnd yeelame, A Naam zẽkame:
(Yeele ɑd mɑm pʋʋsgã lɑ m kodgrã lɑ m vɩɩmã lɑ m kũumɑ yɑɑ Wẽnd A ye n so sẽn yɑɑ bõn-nɑɑnsã nɑɑbã*
Lɑgm-n-tɑɑr pɑ be ne-A ye, lɑ rẽ me lɑ B sɑgl mɑɑm tɩ m mɑɑne lɑ mɑm yɑɑ sɑk-n-tũ-rãmbã rẽenem soɑbɑ)
[Al-An’ʿaam 162-163]
Sẽn leb n be lagem-n-taarã pʋgẽ, -yaa f sẽn na n loe tɩ ad Wẽnd tara paga, bɩ biiga- Wẽnd Naam yɩ wagell n zẽk n yi rẽnda, zẽkr tεkẽ- maa f sẽn na n loe tɩ soab-rãmb n be zẽng sẽn ka Wẽnde, n kẽnesd yεlã dũni kãngã pʋgẽ.
(La tɩ soab zẽms sã n dɑ be b yiibã pʋgẽ -saasẽ wã la tẽngẽ wã- tɩ pa Wẽnde , b yiibã (saagã la tẽngã) ra na sãame, yɩleng be ne Wẽnd, sẽn yaa Al-ars wagellã Naaba, n yi bãmb sẽn sɩfdã.)
[Al-Anbiyaa’ʋ 22]
Yiib soaba: yaa tɩɩm la bagre la f sẽn nɑ n yeel tɩ f mii sẽn solge:
Tɩɩmã la bagrã yaa kɩfẽndo, la tɩɩm soab ka yɩt tɩɩm soaba, rẽnda sẽn tar tõkr ne sʋɩtãambã la b tũubu, zẽng sẽn ka Wẽnde, rẽ n kɩt tɩ ka sõmb ne lɩslaam t’a kẽng tɩɩmã-rãmb nengẽ ye, lɑ ka sõmb ne-a me t’a kõ-b sɩda b sẽn yagda pʋgẽ la b sẽn yeel tɩ bãmb mii sẽn solgã pʋgẽ, la b sẽn togsd yel nins sẽn na n yɩ la kibae nins b sẽn yẽgemd t’a na n wa yɩɩme wã ye.
Wẽnd yeelame A Naam zẽk yã:
(yeele: ” bõn-naands nins sẽn be saasẽ wã la tẽngẽ pa mi sẽn lill ye, rẽnda Wẽnd bala)
[Annamlʋ 65],
A leb n yeelame A Naam yɩlegyã:
(Sẽn solg Mita, A pa vẽnegd A solgrã ne ned baa a yembr ye.*
rẽnda ned ning A sẽn yar a soaba, sẽn yaa tẽn-tʋʋma, bãng tɩ Yẽnda, A kẽesdame, yẽ neng taoore la a poor wεεngẽ kordba.)
[Alginnu 26, 27]
Tãab soaba: yaa wẽgdo:
La wẽgdã yɑɑ ragnoor sẽn yalme, tɩ tʋʋm wẽnsã wʋsg fãa kẽeda beenẽ, la sɩf wẽnsã sẽn tar vũun ninsaal zugu, rẽnd ninsaal sẽn wẽgd a meng kẽeda pʋgẽ beenẽ, la ninsaal sẽn wẽgd zamã ning yẽ sẽn beẽ wã, halɩ n tɩ tãag ninsaal sẽn wẽgd a bεεba, Wẽnd yeelame, A Naam zẽkame:
(la neb wẽngr ra wa rɩk yãmba tɩ y ka tẽeg tɩrg ye, tẽeg-y tɩrg tɩ rẽ n pẽ ne Wẽnd-zoεεga, la y zoe Wẽnde, ad Wẽnd yaa Minim tẽng-n-biig ne yãmb sẽn tʋmdã.)
[Al-Maa’ɩda 8].
La sɩd la hakɩɩka, ad Wẽnd kõo tõnd kibare, A Naam zẽkame, tɩ ad A ka nong wẽgdbã ye, Wẽnd Tẽn-tʋʋmã yeelame, Wẽnd pʋʋsg la A tɩlgr be a yĩnga, tɩ Wẽnd yeelame, A Naam zẽkyã:
( Yaa mam yembse, ad Mam gɩdga wẽgd Mam zugu, n maan-a t’a yaa haraam yãmb ne taab sʋka, bɩ y ra wẽg taab ye) [24].
T’ɑ yeele, Wẽnd pʋʋsg la A tɩlgr be a yĩnga:
( Sõng f ma-biiga zem t’a yaa wẽgd maa yaa b sẽn wẽg-a soɑbɑ, tɩ ned yeele: “Wẽnd Tẽn-tʋʋmã, m songd-a lame tɩ b sã n wẽg-a wε, la a sã n yaa wẽgda, m na n sõng-a la wãn-wãnã?” T’a yeele ” fo gɩt-a lame maa f gɩdg-a n yi wẽgdã, ad rẽnda lɑ ɑ sõngre”) [25].
[24] Yaa a Muslim n yiis-a (manegrã la tõkrã la zʋg sõngã gafẽ) ragnoor sẽn gomd wẽgdã gɩdgr pʋgẽ (16/132)
[25] Hadiisã yaa a Bʋẖaarɩ n togs-a (kɩtaab al-mazaalɩm wal gaḍbɩ) wẽgbã la gẽegã gɑfẽ (baab) ragnoor sẽn yet tɩ “sõng f ma-biiga, zem t’a yaa wẽgd maa b wẽg-a lame (3/168)
Naas soaba: yaa yõor ning Wẽnd sẽn gɩdgã kʋʋbo, sã n pɑ tũu ne sɩdɑ:
La yẽnda yaa yel-beed sẽn yaa bedre, Lɩslaoongã dĩin pʋgẽ, tɩ Wẽnd pʋlʋm beedo a zugu, ne nang sẽn zabde, la A leb n maan sɩbgr sẽn yaa kẽgeng wʋsgo b rãmb zugu dũni pʋgẽ. La rẽnda yaa kʋʋdã kʋʋbo, rẽndame tɩ yaa kiidã neb n wa n yaaf n base, Wẽnd yeelame, A Naam zẽkame:
(yaa rẽnda yĩnga tɩ Tõnd gʋls n rogl ɭsrayεεl koamba, tɩ ned sã n kʋ yõore, tɩ pa tũ ne yõore, maa yaa sãang tẽngã pʋga, yaa wala a kʋʋ nebã zãnga, la ned sã n põsg-a (yõore), yaa wala a vɩɩmsa nebã gilli)
[Al-Maa’ɩda 32].
A leb n yeelame A Naam yɩlgyã:
(Lɑ sẽn kʋ a sɩd-kõtɑ pʋ-toogo ɑ rolb yɑɑ Gεhãnem Bugum t’ɑ yɑɑ ruumdɑ ɑ pʋgẽ tɩ Wẽnd gẽ-ɑ lɑ A kãɑ-bɑ lɑ A sεglg ɑ yĩngɑ nɑmsg sẽn yɑɑ zɩsgo)
[Annisaa’ʋ 93]
Nu soaba: yaa maan-n-zʋʋg nebã zugu, b arzεgsã pʋgẽ:
zem tɩ yaa ne zuubu, zem tɩ yaa ne wẽgdo, maa yaa fãabo, maa yaa belgre, maa yaa zãmbo, maa yaa sɩlɩm, maa zẽng sẽn ka yɩ ne rẽnda, Wẽnd yeelame, A Naam zẽkame:
(Lɑ wɑgd raoogo lɑ wɑgd-poakɑ, bɩ y kʋʋg b yiibã nus tɩ yɑɑ rolbo ne b sẽn tʋmã, n yɑɑ sɩbgre sẽn yi Wẽnd nengẽ, lɑ Wẽnde yɑɑ windɑ n yɑɑ bʋʋd Mitɑ)
[Al-Maa’ɩda 38].
A leb n yeelame A Naam yɩ yɩlegyã:
(lɑ y rɑ rɩ yãmb arzεgsã ne tɑɑb sʋkɑ zɑɑlem ye)
[Al-baƙara 188]
A leb n yeelame A Naam yɩ yɩlegyã:
(Ad neb nins sẽn rɩt kɩɩbsã arzεgs ne wẽgdã, ad b sẽn rɩtã yɑɑ Bugum b pʋsẽ wã, b nɑ n widɑ Bugmã pʋgɑ)
[Annisaa’ʋ 10].
Rẽnd Lɩslaoongã, a zabda sɩd-sɩda maan-n-zuug neb a taabã arzεgsã zugu , la a kengd yel-kãngã, la a rɩgl sɩbgre ne ned ning sẽn maana n zʋʋgdẽ wã, n tãsd-a, yẽnda la neb sẽn wõnd yẽnda, sẽn yaa neb nins sẽn gudgd nin-buiidã vɩɩmã.
Yopoe soaba:yaa liibg la zambo:
Tʋm-n-taarã fãa pʋgẽ, sẽn yaa koosgo la raabo la alkaool-rãmba la zẽng sẽn ka yɩ ne rẽnda, la yẽ yaa sɩf-rãmb b sẽn sãbse, tɩ Lɩslaoongã gɩdg-ba, n bugs n yi-ba
Wẽnd yeelame A Naam zẽk yã:
(wɩɩbd be ne zãmbdbã.*
ninsi, b sã n na n vug nebã nengẽ, b pisdame.*
La b sã n na n vug n kõ nebã, maa b sã n na n mak, b zãmbdame.*
Rẽ yĩnga bãmbã pa tẽede tɩ b na n yik-b lame*
ra zɩsgã raarã?.*
raar ning nebã sẽn n yik n yãnese, bõn-naandsã Gʋʋld yĩnga.)
[Al-muṭaffɩfɩɩn 1-5]
tɩ a yeele, pʋʋsg la tɩlgr be a yĩnga:
(Ned ning sẽn zãmbɑ tõndo, ka be tõnd pʋgẽ ye) [26]
A le yeelame A Naam Zẽk yã:
(ɑd Wẽnd pɑ nong sẽn yɑɑ zãmb toog soɑbɑ n yaa beeg toog soɑb ye)
[Annisaa’ʋ 107].
[26] Haadiisã yaa a Muslim n yiis-a (Lɩɩmaoongã) sɩd-kũunã gɑf pʋgẽ, nabiyaamã koεεg sẽn yeele ( Ned ning sẽn wẽga tõndo, rẽ ka be tõnd pʋgẽ ye) (2/109).
-Yopoe soaba: yaa maan-n-zʋʋg nebã zugu:
B burkĩndẽ wã, ne tʋɩ la wɩdga la kãnegre la sũ-kiiri la tẽ-wẽnse la pẽes-n-bãnge, la yaalgo, la zẽng sẽn ka rẽnda. Lɩslaoongã maanda yã-beedo n rat n tilg zãma sẽn yaa yɩlemde, tɩ nonglem la ma-biiri la minungu la tõk-n-taar la tʋm-n-taar wil b pʋgẽ wã, rẽnd n kɩt t’a zabd ne pãnga, bãas nins fãa sẽn be nin-buiidã pʋgẽ wã, sẽn yɩt sabab tɩ nebã welgd taaba, tɩ beemã la gẽegã la pa-nand-taaba vẽnegd nebã ne taab sʋka.
Wẽnd yeelame A Naam zẽk yã:
(yaa yãmb neb nins sẽn kõ sɩd ne Wẽnde, neb ra yaal neba, tɩ b tõe n wa yɩɩ sõma n yɩɩd bãmba, pa pagb me ne pagba, tɩ b tõe n wa yɩɩ sõma n yɩɩd bãmba, ra wɩd-y mens ye, la y ra lob taab ne soand wẽns ye, dĩin yiib yʋʋr yɩ wẽnga liimaoong poorẽ, la ned ning sẽn pa tuuba…Bãmb rãmba la wẽgdba*
yaa yãmb neb nins kõ sɩd ne Wẽnde! Zãag-y tẽ-wẽnsã wʋsgo, ad tẽebã sãnda yaa zunuuba, la y ra pẽes ye, la yãmb sãnda ra wɩd sãnda ye, rẽ yĩnga yãmb ned kam fãa noangame n na n wãb a ma-bi-taag nemdo t’a yaa sẽn ki? Rẽnd yãmb kisa rẽ, la y zoe Wẽnde, ad Wẽnd yaa tuubg rẽegda, n yaa yolsg Naaba.)
[Alhʋgʋraat 11, 12]
Yaa woto bal la Lɩslaoongã zabd ne kengre bu-welsgo la paoog-taaba nin-buiidã ne taab sʋka, rẽnd b fãa gilli, Lɩslaoongã gesg pʋgẽ, b yaa yembre, Laarab ka tar yɩɩdlem ne zẽng sẽn ka Laarab ye, pεεlg ka tar yɩɩdlem sablg zugu ye, rẽnda yẽm-kãm fãa sẽn zãad bũmb ninga a sũurẽ wã sẽn yaa dĩin la Wẽnd-zoεεga. B fãa põsda taaba tʋʋm-sõmbsã pʋgẽ, Wẽnd yeelame, A Naam zẽkame:
(yaa yãmb a neba! Ad Tõnd naana yãmba roap la pagba n maan yãmb tɩ y yaa ninbuiidu, la buud-buudu, tɩ y na bãng taab yĩnga, ad yãmb sẽn yɩɩda waoogr Wẽnd nengẽ yaa sẽn yɩɩda yãmb ne Wẽnd zoεεga, ad Wẽnd yaa mita, n yaa minim tẽng-n-biiga.)
[Alhʋgʋraat 13]
Nii soaba: yaa warã tõobo-tentεεgã- la rãam yũubu la bõn-suudsã -doroog-rãmbã- rɩkre:
Wẽnd yeelame A Naam zẽk yã:
(Yãmb a sɩd-kõtbã! Ad rãamã la tentεεgã la rʋb-kugã la tẽn-kugã, yaa rẽgd sẽn yaa a Sʋɩtãan tʋʋma, bɩ y zãag-a, sãnde y na tɩlge.*
Ad a Sʋɩtãan tʋllame n na n kẽes beem la gẽeg yãmb sʋka, rãamã la tentεεgã pʋgẽ, la a gɩd yãmb n yi Wẽnd yʋʋrã tẽegre la Pʋʋsga, la rẽ yĩnga yãmb nɑ n basame bɩɩ?)
[Al-Maa’ɩda 90, 91].
-Wae soaba: yaa gɩf wãbre la zɩɩm la kukur nemdo:
La rẽgd nins fãa gill sẽn namsd ninsaalã, woto bala, la kodgr ninga sẽn baood pẽnegr zẽng sẽn ka Wẽnde, A Naam yɩ wagell n zẽke:
(yɑɑ yãmb rãmb nins sẽn kõ-b sɩdɑ, rɩ-y bõn-yɩlmɑ Tõnd sẽn rɩlg yãmbã lɑ y pʋʋs Wẽnd bɑrkɑ tɩ sã n yɑɑ Yẽ lɑ y tũudã*
ɑd A gɩdgɑ yãmb zugu gɩfã lɑ zɩɩm lɑ kurkur nemdo lɑ b sẽn kodg ne sẽn pɑ Wẽnd Yʋʋre, lɑ sẽn pɑk ɑ soɑbɑ t’ɑ pɑ kedge n pɑ mɑɑn n zʋʋg soɑbɑ, rẽnd zunuub kɑ ɑ zug ye, ɑd Wẽnd yɑɑ Yɑɑfdɑ n yɑɑ Yolsdɑ)
[Al-baƙara 172-173]
-Piig soaba: yaa yoobo la a Lʋʋṭ nebã tʋʋm (rɑb ne tɑɑb kẽed-n-tɑɑre) maanego:
Yoobã yaa bũmb sẽn yaa wẽnga, n sãam zʋgdo la ninbuɩdã, n leb n yaa sabab tɩ buud gẽdgd taaba, tɩ zags yeebdẽ, tɩ wub sõng kongdẽ. La (tãmpiibã) yood bi wã yɑɑ sẽn wʋmd yel wẽngã toomã, la b kisgd wãmã wã, Wẽnd yeelame A Naam zẽkame:
(La y ra pẽneg yoobo, ad a yaa yel-beedo t’a sor yaa yooko,)
[Al’ɩsraa’ʋ 32].
leb n yaa yẽ n yaa sabab tɩ kẽed-n-taarã bãas wʋsg sãeegdẽ, sẽn halkd nin-buiidã lugrã. Wẽnd Tẽn-tʋʋma -Wẽnd pʋʋsg la A tɩlgr be a yĩnga- yeelame:
(Tʋʋm beed ka yɩ sẽn na sãeeg neb pʋgẽ, hal tɩ b wa vẽnegd-a, rẽndame tɩ bã-longdem sãeeg b pʋgẽ, sẽn yaa bãas sẽn rag n ka zĩnd b rang-taoor-rãmbã nengẽ) [27]
[27] Hadiisã yaa ɭbn Maagε n yiis-a (Fɩtnã wã gaf pʋgẽ) ragnoor sẽn gomd sɩbgr-rãmbã yelle (2/1333) t’a Albaani yeel tɩ hadiisã manegame (Ṣahɩɩh ɭbn Maagε wã pʋgẽ 2/370)
Woto n kɩt tɩ Lɩslaoongã sagl tɩ b gɩd soɑy nins fãa sẽn tũud n tʋg yoobã, a sagla lɩslaambã tɩ b sulg b nini, bala haraamã gesgo, yẽnda la sorã sɩngre n tʋgd yoobẽ wã, la a sagl pagbã tɩ b ludi, la b pili, la b yõk b mense, sẽn na yɩl tɩ zamã wã nin-buiidã paam koglgo n yi yoobã yel-beedã, la sã n na n ges neng a ye wã, a saglame tɩ b loe furi la a keng yel-kãng zugu, la a pʋs n pʋlma keoore la yel-sõmde, halɩ tɩ keoor tʋg n be ne wʋm-noog ninga yi-kãadb a yiibã sẽn maande, tɩ yaa sẽn na n yɩlẽ tɩ zags wagl zĩndi, sẽn yaa yõk-m-menga, n yaa sẽn sεgle, n tõe n wub koamba wubr sẽn manege tɩ b yɩ beoog raopa.
-Piig la a yembr soaba: yaa rɩbaag rɩɩbo:
Rɩbaa wãada zamaanã paoobã, a leb n zaεεgda zaεεg yooko tʋlsdã ligdã rɑɑbã, zem t’a yaa toanda a tolbã pʋgẽ, maa a yaa talgɑ a tʋlsmã yĩnga. La yẽ me yaa ligd pengre n tʋg wakat sẽn yãk toaaga ne paasga sẽn yãk toaaga ligdã yaoobẽ. Rẽnd rɩbaa bẽta talga tʋlsmã ne ligdã n zɩsg a poorã ne sama sẽn zam taaba n paasd lidg zugã.
La ned ning sẽn yaa rɩbaa rɩta bẽta toanda tʋlsem, maa te-maandã, maa koaandã, maa zẽng sẽn ka yɩ bãmbã, sẽn yaa neb nins sẽn rãmbd zamaanã arzεkã.
A bẽta b tʋls kεgengã n tʋg ligd vẽenegã n na n rogl-b bũmb sẽn paas yõodẽ wã, b sẽn na n peng yẽ wã, la pengdã yaool n ka nɑ n lagem bũmb ning sẽn tõe n paam bãmbã, sẽn yaa narb la bõnã ye.
Rẽnd toandã sã n lʋɩ, samã zombda taab a zugu, tɩ rɩbaag rɩt kãngã soaba maneg n vuug-a n lubi. La sã n rag n mikame tɩ b ra lagema taab yõodẽ wã la bõnẽ wã, tɩ yãoa tʋm ne a pãnga, tɩ yãoa tʋm ne a ligdi, wala Lɩslaoongã sẽn sagl to-to ningã, arzεkã rag n na n gilgda wakat fãa, tɩ yaa manegr ne nebã fãa.
Wẽnd yeelame A Naam zẽk yã:
(yɑɑ yãmb neb nins sẽn kõ sɩdɑ, zoe-y Wẽnde lɑ y bɑs sẽn ket nebã nengẽ sẽn yɑɑ Rɩbɑɑgã tɩ yãmb sã n yɑɑ sɩd-kõtbɑ*
Lɑ yãmb sã n pɑ mɑɑne bɩ y kol zɑbre sẽn yi Wẽnd lɑ A Tẽn-tʋʋmã nengẽ, lɑ yãmb sã n tuubi yãmb ligd-zutã yɑɑ yãmb n so, yãmb pɑ wẽgde b pɑ wẽgd yãmbɑ*
Lɑ yãmb sɑm-soabã sã n yɑɑ keelem soɑbɑ bɩ y koll-b yol-yol sɑsɑ, lɑ yãmb sã n kell n mɑɑn doaagɑ lɑ sõmɑ ne-yã tɩ y sã n miime)
[Al-baƙara 278, 279, 280]
-Piig la a yiib soaba: yã-beedo la beedo:
Yẽ me yaa nong-m-meng bala tagmase, rẽnd beed soaba, a bĩngda a ligda, n tõdgd Zakã yãkre, sẽn kõt talsã la nimbãan-rãmbã, n tõdgd sõng-taaba la ma-biirã na-kẽndrã, sẽn yaa Wẽnd la A Tẽn-tʋumã sẽn sagl bũmb ningã, Wẽnd yeelame, A Naam zẽkame:
(Lɑ sẽn mɑɑnd beed ne bũmb ning Wẽnd sẽn kõ-bã sẽn yɑɑ A yɩɩdlemã, rɑ tẽed tɩ rẽ lɑ sõmɑ ne bãmb ye, pɑ boto ye, ɑ yɑɑ wẽng ne-bɑ, b nɑ n bobl-b lɑme b sẽn mɑɑn beed ne wã dũni yikr rɑɑre lɑ ɑd Wẽnd n so sɑɑs lɑ tẽng fɑɑdo, lɑ Wẽnd yɑɑ minim tẽng-n-biigɑ ne bãmb sẽn tʋmdã)
[Aal-ɭmraan: 180.]
-Piig la a tãab soaba: yaa zĩri-beed la kaset zĩri:
La tõnd rag n togsame tɩ reng taoore, Nabiyaamã -Wẽnd pʋʋsg la A tɩlgr be a yĩnga- koεεgã::
(Ad zĩri-beed peegdame n tʋgd wẽngẽ, wẽng me peegdame n tʋgd Bugmẽ, la ned ka bakdẽ n yagda la a tũusd yagbo, hal tɩ b wa tʋg n gʋls-a Wẽnd nengẽ t’a yaa pʋ-yagda)
La sẽn leb n be zĩri-beed kõbg b sẽn kisgi, yaa sẽn na n yaa kaset zĩri, la Nabiyaamã, Wẽnd pʋʋsg la A tɩlgr be a yĩnga, a bugsa nebã tɩ seke, n rig-ba n zãag-a, la a leb n bugs-ba n yi a wẽngã, t’a zẽk a koεεgaã ne gom kãngã n yeel a Ṣahaabsã:
(” M ka na n kõ-y kibar ne zunuub bεdã sẽn yɩɩd bedrem? Yaa lagem-n-taar ne Wẽnde, la roagdb a yiibã namsgo”. La mikame t’a rag n kɩllame, t’a zĩndi n yeele :” yaa zĩri-beed koεεga la kaset-zĩri”) [28]
Rẽnd a ka bak n yɩlemd-a woto, n bugsd a zamã wã tɩ b ra wa lʋɩ a pʋgẽ ye.
[28] Hadiisã yaa a Bʋẖaarɩ n togs-a (kɩtaab aššahaadaat) kaset-rãmbã kũunã gaf pʋgẽ, (baab) ragnoor sẽn wĩnigd b sẽn yeel kaset zĩri pʋgẽ (3/225).
-Piig la a naas soaba: yaa waoog-m-menga, la belg-m-menga, la wuk-m-menga, la puglgu:
Waoog-m-menga, la belg-m-mengã, la puglgã, yaa sɩf wẽnse, b sẽn kisg Lɩslaoongã dĩin pʋga, lɑ sɩd la hakɩɩka, Wẽnd togsa tõndo, A Naam zẽkame, t’A ka nong waoog-m-mens-rãmb ye, la A leb n yeel b yellã Yaoolem raarã wã:
(Rẽ yĩnga pa Gεhannam pʋga n yaa gãag zĩig ne waoog-m-meng-rãmba?)
[Azzʋmar 60],
Rẽnd waoog-m-meng soaba sẽn yaa belg-m-meng soaba, sẽn maan yel-solemd ne a menga, yẽ yaa b sẽn gẽ a soab Wẽnd nengẽ, la nebã nengẽ.
About The Author
