5- Sɩd-kũunã zeng-raadã

F sã n bãng tɩ Lɩslaoongã zeg-raadã yaa a tũudm-rãmbã sẽn vẽnegã, lɩslaam sẽn maand-a t’a maanegã wĩnigdẽ t’a yaa lɩslaama, rẽnd zeng-raad me n be sũurã pʋgẽ, tɩ yaa tɩlae ne lɩslaam t’a kõ sɩd ne-a, bʋɩl yĩng t’a Lɩslaoongã manege, tɩ b boond-a “arkaan al-ɩɩmaan= sɩd-kũunã zeng-raado”, la a zɩsgrã sẽn pɑɑs a sũurẽ wã fãa n pidi, la a sɩd-kũunã me pɑɑsg sẽn zẽkde t’a paam bʋʋm n kẽ Wẽnd yembs nins sẽn yaa sɩd-kõtbã pʋgẽ, la sɩd-kũunã yaa dargε sẽn yɩɩd Lɩslaoongã dargε, rẽnd sɩd-kõt fãa gill yaa lɩslaama, la ka lɩslaam fãa n ta sɩd-kõtbã zĩigẽ ye.

Bala sɩd-kõt tõeeme n tar sɩd-kũunã yẽgre la ad a ka pid wala a sẽn sõmb n yɩ wã ye.

la (lɩɩmaoongã) sɩd-kũunã zeng-raadã yaa a yoobe

La yẽ me yaa f kõ sɩd ne Wẽnde; la A malεgsã la A Gaf-rãmbã la A tẽn-tʋʋmbã la laahr (yaoolem) daarã, la f kõ sɩd ne A Pʋlʋngã, a noogo la a toogo

Rẽnd zeng-ra rẽengã: yaa f kõ sɩd ne Wẽnde, tɩ sũurã pidi ne Wẽnd nonglemã la A zɩsgrã, la paoog-m-meng la gãneg-m-meng Wẽnd taoore, la A saglsã tũubu yẽnd a Yembr tãa, lagem-m-taar ka be ne-A ye, wala sũurã me sẽn pid ne Wẽnd yaεεsgo la bũmb ning sẽn be Wẽnd nengẽ wã tẽebo. Wakat kãngã a lebgda Wẽnd yembsã yembre sẽn yaa Wẽnd-zoεtbã, sẽn yaa neb nins sẽn rɩk-b A so-tɩrgã .

Zeng-raoog a yiibẽ soaba: yaa a kõ sɩd ne Malεgsã, la ad b yaa Wẽnd yembse, Wẽnd naan-b lame ne nuura ka tõe n bãng b waooglemã tεkɑ sẽn be saasẽ la tẽngẽ sã n ka Wẽnd A Yembr ye, Wẽnd naan-b lame tɩ yaa Wẽnd tũudum bala la A Yʋʋr tẽegre la A yɩlgre” b yɩlgda Wẽnd Yʋʋrã yʋng la wĩndga, b ka yaad ye,

(b pa kɩɩsd Wẽnd A sẽn sagl-b ne bũmb ningã ye, la b tʋmdẽ b sẽn rogl-b ne bũmb ningã.)

{At-tahrɩɩmʋ 6}

B yembr fãa tara a tʋʋmde Wẽnd sẽn wõr-a ne-a, bee b pʋgẽ, sẽn zãad Al-ʿarš, bee b pʋgẽ b sẽn boblg yembsã yõya reegre, bee b pʋgẽ, sẽn sigd ne wahɩ wã n yi saasẽ wã, la yẽ me la a Gibriila (Tɩlgr be a yĩnga) la yẽnd n yɩɩd-ba, la bee b pʋgẽ sẽn yaa arzãn gũudba, la bee b pʋgẽ sẽn yaa Gεhannem gɩtba, la zẽng sẽn ka yɩ ne rẽnda, sẽn yaa malεgse, sẽn yaa manegdba, b nonga sɩd-kõtbã sẽn yaa ninsaalbã, la b wʋsgd yaafa kosg b yĩnga, la b kotẽ n kõt-ba.

Zeng-raoog a tãabẽ soaba: yaa sɩd-kũuni ne sεb nins sẽn sigi n yi Wẽnd nengẽ wã

Rẽnd lɩslaam kõta sɩda tɩ Wẽnde, A sika gaf-rãmbã A sẽn tʋʋll a soaba zug A tẽn-tʋʋmbẽ wã, sẽn kʋmb kibar sẽn yaa sɩda, la sagls sẽn tẽeg tɩrga sẽn yi Wẽnd nengẽ, A Naam yɩlgame. La a kõ sɩd t’A sika Taooraata a Muusa zugu, la Lingiila a Iisa zugu, la Zabʋʋr a Dawʋʋd zugu, la Gaf-rãmba n kõ a ɭbraahɩɩm, la gaf-kãensã ka leb n ket rũnda wa la wẽnd sẽn sik-ɑ wã ye, A Naam zẽkyã. Woto bala, a kõta sɩda, tɩ Alkʋrãanã wẽnd sik-a lame n kõ A Nabiyaam-rãmbɑ pidsdã -Wẽnd pʋʋsg la A tɩlgr be a yĩnga- la a kõ sɩdɑ tɩ Alkʋrãanã siga Aayae-rãmb sẽn tũnug taaba yʋʋm pisi yi la a tãab pʋgẽ, tɩ Wẽnd gũ-a n yi tedgre la toeeng buud fãa:

(Ad yaa Tõnd n sik Alkʋrãanã, la ad yaa Tõnd n na n gũ-a.)

{Al-higir 9}

Zeng-raoog a naa soaba: yaa kõ-sɩd ne tẽn-tʋʋmbã

(La b yellã reng n dɑ gomɑme tɩ looge n welse) la kõ-sɩd tɩ zama-rãmb fãa gill sẽn loog zamaan wokã, b tʋmsa nabiyaam-rãmb b nengẽ. B dĩinã yaa a yembre, b Soabã yaa A Yembre, tɩ b boond nebã n tʋgd Wẽnd-yembgo la A tũudum, la b bugsd-ba n yit kɩfẽndo la lag-m-taare la Wẽnd kɩɩsgo,

(lɑ zama kɑ zĩnd sẽn loog rẽndɑme tɩ bugsd zĩnd b pʋgẽ)

{Faaṭɩr 24 }

La ad b yaa yĩng-rãmba wala nebã fãa gilli, tɩ Wẽnd tũus-ba tɩ b taas A tẽn-tʋmdã:

(Ad Tõnd tʋma fo nengẽ, wala D sẽn tʋm a Nuuh nengẽ wã, la nabiyaam rãmbẽ wã yẽ loogr poorẽ, la Tõnd tʋmsame a ɭbraahɩɩm nengẽ la a ɭsmaa’ʿɩɩl la a ɭsḥaak, la a Yaa ƙuub, la Yagengsã, la a ɭɩsa la a Ayyʋʋba la a Yuunusa la a Haarʋʋna la a Sʋlaymaane, la Tõnd kõ a Daawʋʋd Zabʋʋre*

La tẽn-tʋʋmb Tõnd sẽn togs foom b rãmb yelle sẽn da reng taoore, la tẽn-tʋʋmb Tõnd sẽn pa togs foom b kibare. La Wẽnd goma ne a Muusa goam tεkẽ.*

yaa tẽn-tʋʋmba sẽn yaa sũ-noogdba la bugsdba, bʋɩl yĩng tɩ nebã ra tall padang Wẽnd zugu, tẽn-tʋʋmbã poorẽ ye, la Wẽnd yɩɩme n yaa winda n yaa bʋʋd Mita.)

{Annisaa’ʋ 163-165}

Lɩslaam kõta sɩda ne b fãa la a nong-b gilli la a sõngd-b gilli, la a ka welgd b bɑɑ yembr ne taab ye, rẽnd ned ning sẽn kɩfla ne b yembre, maa a tʋʋs-a lame, maa a nams-a lame, rẽnd a kɩfla ne b fãa gilli.

La b sõma sẽn yɩɩd la sẽn yɩɩd ne ziir zɩslem Wẽnd nengẽ, yaa nabiyaam-rãmbã pidsdã a Mʋhammad -Wẽnd pʋʋsg la A tɩlgr be a yĩnga-

Zeng-raoog a nu soaba: yaa kõ-sɩd ne laahr (Yaoolem) raarã

La kõ-sɩd tɩ Wẽnd na n yika yembsã n yi b yaadẽ wã lɑ A tigm-bɑ Yikɑ-raarã, b zãnga, n na n geel-ba b tʋʋmã b sẽn tʋm dũni wã:

(Raar ning b sẽn na n tedg tẽn-gãngã ne tẽn-gãng a to, la saasã me ne ɑ tɑɑbɑ, tɩ nebã na n puk Wẽnd taoorã yãnesg yĩngɑ, sẽn yaa Yembr n yaa Modgr Naabã.)

{ɭbraahɩɩm 48}

(saagã sã n wa pãrge.*

La ãdsã sã n wa lʋɩtẽ.*

La moagã sã n wa pusdẽ*

La kabã wã sã n wa bugsdẽ.*

Yõor na bãng a sẽn tʋm tɩ reng taoore la a sẽn tʋm tɩ yaoole.)

{Al-ɩnfɩṭaar 1-5}

(Rẽ yĩnga ninsaal pa yã tɩ Tõnd naan-a lame ne mane, la a sẽn tol n lebg tak-n-taar sẽn vẽneg soaba.*

La a rɩk bilgr ne Tõndo, n yaool n yĩm a naanegã; n yeele: ” Ãnd n tõe n vʋʋg kõaba t’a sã n kẽ bugdu?”.*

Yeele:” Soab ning sẽn yẽbg a raẽenemã n vʋʋgd a, la Yẽnd n yaa mit ne naaneg fãa”.*

“””Soab ning sẽn maana bugum n kõ yãmbã n yi tɩ-maasrẽ wã, tɩ yãmb yaa sẽn vidgd ne-a””.*”

Rẽ yĩnga Soab ning sẽn naana Saasã pa tõe n naan b bilgr sɩda? A tõeeme! La Yẽnda la naand toog Soaba n yaa Mita.*

ad A yellã, a sã n rat bũmbu yaa A yeel-a bal t’a yɩ, t’a be yɩɩbẽ.*

Rẽnd yɩlgemd be ne Naab ning bũmb fãa soolem sẽn be A Nugẽ wã, la Yẽ nengẽ la b na n lebs-yã.)

{Yasɩɩn 77-83}

(La Tõnd na n rɩgla zɩslem mɑkgdsã sẽn tẽeg-tɩrgã yikrɑ raarã, tɩ b pa na n wẽg yõor baa fʋ yeɩ, baa tɩ yaa bũmb bilf wala goandg biiga, D na n waa ne-a, la gεεndb tɑ tεk ne Tõndo.)

{Al-anbiyaa’ʋ 47 }

(Rẽnd ned ning sẽn wa n tʋma sẽn paood to-to fãa, tɩ yaa sõma, a yãt-a lame. La ned ning sẽn wa n tʋma sẽn paood to-to fãa, tɩ yaa wẽnga, a yãt-a lame)

[ Azzalzala 7-8].

La b pakda Bugmã ragnoe wã ne ned ning Wẽnd gẽegã la A kisgrã la naong zabdgã sẽn sɩdg b rãmb zugã. La b pak arzãnã ragnoe wã ne sɩd-kõtbã sẽn tʋmdb tʋʋm sõmbsã

(tɩ Malεksã yekd-b n beedẽ:” ad wã yaa yãmb raar ning b sẽn da pʋlem yãmbã.)

{Al-anbiyaa’ʋ 103 }

(la b kãag neb nins sẽn kɩflbã zama-zama n tʋg Gεhanma, hal tɩ b sã n wa ta-a, b pakda a ragnoyã, t’a gũudbã yeel-ba: “Rẽ yĩnga tẽn-tʋʋmbã pa wa yãmb nengẽ sẽn yi yãmb pʋgẽ, n karemd yãmb y Soabã Aayaε, la b bugsd yãmb ra-kãngã sεgbã?” La b yet tɩ yaa sɩda, la namsg koεεg sɩdga kɩfr-dãmb zugu, Tɩ b yeel: “kẽ-y Gεhanm ragnoyã tɩ y yaa ruumdba a pʋgẽ, rẽnd waoog-m-meng zĩndig zĩig yɩ wẽnga”.*

la b peeg neb nins sẽn zoe b Soabã zama-zama n tʋg arzãnã, hal tɩ b sã n wa ta-a tɩ b pak a ragnoyã t’a gũudbã yeel-ba: Tɩlgr be ne-yã, y yɩlg-yã, bɩ y kẽ-y-yã-a tɩ y yaa ruumba”.*

tɩ b yeele: “pẽgr be ne Wẽnd ningã sẽn sɩdg tõnd A pʋlʋngã la A kõ tõnd tẽngã tɩ yaa faado, tɩ d zĩ arzãnẽ wã, d sẽn ratẽ, rẽng tʋmdb keoor yɩ neema”.)

{Azzʋmar 71, 75}

Arzãn-kãngã, be a pʋgẽ sẽn yaa neema nifr sẽn ka yã, tɩ tʋbr ka wʋme, la sẽn põs n ka ning ninsaal buud fãa sũurẽ,

(Rẽnd yõor kɑ mi b sẽn solg n bĩngã sẽn yi sũ-noog bũmb ye, tɩ yaa b sẽn dɑ yɩ n tʋmdẽ wã rolbo.*

Rẽ yĩngɑ sẽn yɩ a sɩd-kõt ne sẽn yɩ a faasɩƙ (dĩin yita), b wõnda tɑɑbɑ? b kɑ yɩt wɑ tɑɑb ye.*

Lɑ sã n yɑɑ ne neb nins sẽn kõ-b sɩd lɑ b tʋm tʋʋm-sõmã wã, b tara Mɑ-ɑwɑɑ arzãna, tɩ yɑɑ sigb zĩiga, b sẽn dɑ yɩ n tʋmdẽ wã rolbo.*

Lɑ sã n yɑɑ ne neb nins sẽn tɑrg n bɑs so-sõngã bugmã lɑ b zĩigɑ, b sã n dɑt n yi ɑ pʋgẽ wã fãɑ b lebsd-b lɑ a pʋgẽ wã, lɑ b yeel-b tɩ: “lemb-y yãmb sẽn dɑ yɑgsd bugum ningɑ wã nango”.)

{Assagda: 17-20}

(Arzãn ning b sẽn pʋlʋm ne Wẽnd zoεtbã bilgri, ko-sood n be a pʋgẽ sẽn yaa koom sẽn pa tedgde, la ko-sor sẽn yaa bĩisim, a noosmã pa tedgd ye, la ko-sood sẽn yaa noosem yũudbã yĩnga, la ko-sood sẽn yaa sɩɩd sẽn yɩlge. La b leb n tar a pʋgẽ tɩ-biisã fãa gilli, la yaafa sẽn yi b Soabã nengẽ, rẽ yĩnga yaa wala neb nins sẽn duumda Bugmã pʋga tɩ b yũnug-b ko-tʋʋlg t’a fãs b yãadã?)

{Mʋhammadʋ 15}

(ad Wẽnd zoεtbã be Arzãn-dãmb pʋgẽ la neema.*

n wʋmsd noogo ne bũmb ning b Soabã sẽn kõ-ba, la b Soabã gũ-ba ne Gεhɩɩm Bugmã.*

rɩ-y la y yũ, yaa beelgo ne yãmb sẽn da yɩ n tʋmdẽ wã.*

bãmb yaa sẽn kɩla gãas sẽn tedg zugu, la b loe b furi ne Hʋʋr-ʿaeen pogsã)

[Aṭṭʋʋrʋ 17-20]

Wẽnd na maan-d fãa gill tɩ d yɩ arzãnã nebɑ.

Zeng-raoog a yoob soaba: yaa kõ sɩda ne pʋlengã, a sẽn noom la a sẽn toe

La ad rãmbg buud fãa sẽn be, a yaa pʋleng sẽn gʋls Wẽnd nengẽ, a yellã zẽkɑme,

(yel pa yɩ sẽn na paam (ned) tẽngã pʋga, pa yãmb pʋgẽ me, rẽndame tɩ bee gaf pʋga, taoor tɩ Tõnd na n pa yɩɩs-a ye, ad rẽnda ne Wẽnd yaa yol-yole.)

{Al-hadiid 22}

(ad Tõndo, bũmbã fãa, D naan-a lame ne geelgo.)

{Al-ƙamarʋ 49}

(Fo ka bãng tɩ Wẽnd mii bũmb ning sẽn be saasẽ wã la sẽn be tẽngã zugu? Ad woto gʋlsɑm tɩ be Gafẽ, ad woto yaa nana ne Wẽnde.)

{Al-hag 70}

Zeng-ra-kãensã b yoobã, ned ning sẽn pids-b la a kõ-b sɩda, sɩd-kũun tεkẽ, a yɩta Wẽnd yembsã sẽn yaa sɩd-kõtbã b yembre, la bõn-naandsã põsa taaba ne sɩd-kũunã dargε-rãmba, rẽnd b yɩɩda taaba, la sɩd-kũunã dargε sẽn tʋg n yɩɩda, yaa Manegrã (ɩhsaan) dargε, yẽ me la fo sẽn na n tʋg n ta dargε ninga, tɩ fo tũud Wẽnd wala fo ne-A lame, f sã n ka ne-A me, ɑd A nee foom [5].

Rẽnd bãmbã rãmbã la bõn-naandsã b sẽn tũus-b rãmba, sẽn põs-b ne dargε zẽkdse arzãnã pʋgẽ, Fɩrdaoosã zĩ-zẽkdsẽ wã.

[5] A Bʋẖaarɩ n yiis-a 4777

About The Author