6-Lɩslaoongã sɑglsã la a zʋgdo
A- a sẽn sagl tɩ b tʋmã
Wãnde yaa Lɩslaoongã zʋgd-rãmb sãnda, tɩ lɩslaambã zama sõmb n maan yã-beed ne-ba, tɩ d na n togs-ba koεεg-koεεgɑ, rẽnd d na n modgame n yiis zʋg-kãensã Lɩslaoongã sẽn tik yẽg ninsã pʋgẽ, Wẽnd Gafã (Alkʋrãan wagallã) la Tẽn-tʋʋm hadiis-rãmbẽ wã, -Wẽnd pʋʋsg la A tɩlgr be a yĩnga-.
Rẽenem: yaa sɩd goama
Lɩslaoongã rogenda a tũudbã tɩ b togs sɩda, la a maan-a lame t’a yaa tagmas sẽn zao ne-ba, ka sõmb ne bãmbã sẽn yaa halhaal ning fãa tɩ b bas yel-kãngã ye. La a bugs-bɑ bugsg tεkẽ n yi zĩri-beedo la a gidgd-ba tɩ b zãag-a n vẽneg-a vẽnegr tεkẽ, Wẽnd yeelame, A Naam zẽkame:
(Yaa yãmb neb sẽn kõ sɩda, zoe-y Wẽnde la y yɩ n naag togs sɩd-rãmbã)
[Attaooba 119].
Tẽn-tʋʋmã -Wẽnd pʋʋsg la A Tɩlgr be a yĩng- yeele:
(Tabl-y sɩda, tɩ ad sɩd peegdame n tʋgd manegre, la manegr peegdame n tʋgd arzãna, la ned ka pakd n togsd sɩda la a gũusd sɩd togsgo, halɩ tɩ b wa tʋg n gʋls-a Wẽnd nengẽ t’a yaa sɩd soaba. La y gũus ne zĩri-beedo, tɩ ad zĩri-beed peegdame n tʋgd wẽngẽ, wẽng me peegdame n tʋgd Bugmẽ, la ned ka bakdẽ n yagda la a tũusd yagbo, hal tɩ b wa tʋg n gʋls-a Wẽnd nengẽ t’a yaa pʋ-yagda) [6]
[6] A Bʋẖaarɩ n reeg-a (6094) la a Muslim (2607).
La zĩrẽ-beed ka sɩd-kõt sɩf ye, ad a yaa munaafɩgsã sɩf-rãmb ɑ ye,[7] Wẽnd Tẽn-tʋʋm -Wẽnd pʋʋsg la A tɩlgr be a yĩnga- yeelame:
(Munaafɩk tagmas yaa a tãabo ɑ sã n yẽs la ɑ sẽn yagde, a sã n pʋlme lɑ a sẽn viigdi, la b sã n maan-a bas-m-yam, lɑ a sẽn zãmde)[8]
Munaafɩk yaa ned ning sẽn vẽnegda tɩ yẽnda yaa lɩslaam, la ad yẽndã a yellã hakɩɩka la a sũurã loεεgẽ, a ka kõ sɩd ne Lɩslaoongã dĩinã ye[7].
[8] Hadiisã yaa a Bʋẖaarɩ n togs-a (kɩtaab al-ɩɩmaan) sɩd-kũunã gaf pʋgẽ, (baab) ragnoor sẽn wĩnigd munaafɩglemã tagmas pʋgẽ (1/15)
Woto n kɩte tɩ Ṣahaab waglsã, b bãng-b lɑme ne sɩdã sɩfo, halɩ tɩ b yembr wa yeele: “tõnd ra ka yɩ n mi zĩrẽ-beedo Wẽnd Tẽn-tʋʋm wakatẽ wã -Wẽnd pʋʋsg la A tɩlgr be a yĩnga-.
Yiibu: yaa boablã lebsgo la alkaool-rãmbã pidsgu la tẽeg-tɩrga nebã ne taab sʋka:
Wẽnd yeelame A Naam zẽk yã:
(ɑd Wẽnd sɑgendɑ yãmb tɩ y kõ boblã b rãmbɑ lɑ yãmb sã n nɑ n bʋ nebɑ bɩ y bʋ ne tẽeg tɩrgɑ)
[Annisaa’ʋ 58].
A leb n yeelame A Naam yɩleg yã:
(la y pids pʋlengã, ɑd pʋlengã b nɑ n sokɑ ɑ yelle.*
La y pids vugbu tɩ y sã n wa vugdẽ, la y mag ne kɩlo sẽn yaa tɩrga, woto la sõma la a baasgã leb n yaa neere.)
[Al’ɩsraa’ʋ 34, 35].
La Wẽnd pẽga muunin-rãmbɑ, (sɩd-kõtbã) ne A koεεg sẽn yeele:
(sẽn pidsd b pʋleng ne Wẽnd la b pa vaand b sard ye)
[Arra’ʿdʋ 20]
Tãab soaba: yaa gãneg-m-menga n dɑ mɑɑn waoog-m-meng ye:
La Nabiyaamã -Wẽnd pʋʋsg la A tɩlgr be a yĩnga- ra yɩɩme, n yɩɩd nebã fãa ne ganeg-m-menga, a ra zĩndida a Ṣahaabsã sʋka tɩ yaa wala b nin-yend bala, la a ra kisame tɩ nebã yik n yals a yĩnga t’a sã n wa watẽ, la sɩdãn a ra yɩɩme tɩ tʋlsem soab wɑtɑ ɑ nengẽ n gãta a nugã n loog ne-a, tɩ ɑ ka lebsd-a rẽndame t’a wa n tʋg n mɑɑnɑ ɑ sẽn tʋllã, la a sagla lɩslaambã ne gãneg-m-menga, n yeele: ( ad Wẽnd tʋmsame tɩ wa mam nengẽ tɩ y gãneg y mense, hal tɩ ned baa a yembr fãa ra wa tʋg n pugl ne a to ye, hal tɩ ned ra wa tʋg n kegd a to zug ye) [9].
[9] Hadiisã yaa a Muslim n reeg-a (17/200), kɩtaab algεnna (arzãnã gafo), baab Ṣɩfaatʋ Allatɩɩ yʋ’ʿrafʋ bihii Ahlʋ Algεnna.
Naase: yaa kũuni la yãk n nɑf manegr pʋgẽ:
Wẽnd yeelame A Naam zẽk yã:
(lɑ yãmb sẽn kõ sẽn yɑɑ sõmɑ buud fãɑ yɑɑ y mens yĩngɑ, lɑ yãmb pɑ yãkd n nɑfdẽ rẽndɑme tɩ yɑɑ Wẽnd yĩngɑ, lɑ yãmb sẽn kõ sẽn yɑɑ sõmã fãɑ b pidsd-ɑ lɑ yel-sõmdã n kõ yãmb, tɩ b pa wẽg yãmb ye)
[Al-baƙara 272]
la ɑd Wẽnd pẽga sɩd-kõtbã ne A kεoog sẽn yeele:
(la b rɩlgd rɩɩbo b nonglem zugu, ninbãan-rãmba la kɩɩba la b sẽn yõg-b rãmb zab-laagẽ.)
[Al-insaanu 8].
La kũunã yaa Wẽnd Tẽn-tʋʋma Wẽnd pʋʋsg la A tɩlgr be a yĩnga- sɩfo, la neb nins sẽn tik-a sẽn yi muumin-rãmbẽ (sɩd-kõtbẽ) wã, ligd baa fʋɩ ka paad a nengẽ rẽndame t’a yãk n naf sõmã wensẽ, a Gεεbr Wẽnd yard be a yĩnga- sẽn yaa Wẽnd Tẽn-tʋʋm Ṣahaabsã a yembre, Wẽnd pʋʋsg la a tɩlgr be a yĩnga-:
“”” b pa kos Wẽnd Tẽn-tʋʋm -Wẽnd pʋʋsg la A tɩlgr be a yĩnga, bũmbu t’a yet tɩ: “”ayo “””
La a leb n pirsame tɩ b waoog sãana, n yeele:
(ned ning sẽn kõta sɩd ne wẽnde, la Yaoolem raarã, bɩ a waoog ɑ sãana. Ned ning me sẽn kõta sɩd ne Wẽnde, la Yaoolem raarã bɩ a tõk a rogem. Ned ning me sẽn kõta sɩd ne Wẽnde, la Yaoolem raarã bɩ a yeel sẽn be neere maa a sĩndi) [10]
[10] A Bʋẖaarɩ n reeg-a (6138) la a Muslim (47).
Nu soaba yaa sugri la namsgã reegre:
Wẽnd yeelame A Naam zẽk yã:
(lɑ f mɑɑn sugr ne bũmb ning sẽn pɑɑm foogã, ad rẽndɑ bee leo-n-wãɑkã pʋgẽ Wẽnd sẽn nongã)
[Al-Lʋƙmaanu 17],
A leb n yeelame A Naam yɩlgyã:
(yɑɑ yãmb neb nins sẽn kõ sɩd ne Wẽnd, kos-y sõngre ne sugr mɑɑnego lɑ Pʋʋsgo, ɑd Wẽnd lɑgmã sugrã rãmbã)
[Al-baƙara 153]
A le yeelame A Naam Zẽkame:
(La ad Tõnd na n rola sug-maandebã keoor neerem sẽn yɩɩd b sẽn da tʋmdã.)
[Annaẖlʋ 96],
Lɑ ɑd Nabiyaamã -Wẽnd pʋʋsg la A tɩlgr ra yɩɩme, n yɩɩd nebã fãa ne sugri la nang reegre, la rɑ rond ne wẽng ye, a nebã nams-a lame t’a boond-b n tʋgd Lɩslaoongẽ, la b pãb-a hal t’a zɩɩmã wa yi, t’a yẽesd zɩɩmã a nengẽ wã la a yetẽ:
(M Soab A Wẽnde, yaaf m nebã, tɩ ɑd b pa mi ye) [11]
[11] Hadiisã yaa a Bʋẖaarɩ n togs-a (kɩtaab al-murtaddɩɩna ( tar-n-yi dĩinã rãmb gɑfẽ) rɑgnoor,(5) (9/20)
Yoob soaba: yãn-zoεεgɑ:
Lɩslaam yaa yõk-m-meng soaba, n yaa yãn-zoεta, yãnd-zoεεg me a yaa kõbg sẽn yi Lɩɩmaoongã (sɩd-kũunã) kõbs pʋgẽ, a leb n tusda lɩslaam n kẽng zʋgd sẽn yaa sõma fãa pʋgẽ la a gɩdgd a soabã n yit gom-beedo la tʋʋm wẽnse, la Nabiyaamã -Wẽnd pʋʋsg la A tɩlgr be a yĩnga- yeelame:
(Yãn-zoεεg ka wat ne bũmbu, rẽnda sẽn yaa sõma bala) [12]
[12] Hadiisã yaa a Bʋẖaarɩ n togs-a (kɩtaab al-adab) zʋgã gaf pʋgẽ, yãnd-zoeerã ragnoorẽ (8/35)
Yopoe soaba: yaa roagdb a yiibã manegre:
Roagdb a yiibã manegre la maan neere n tʋg b yiibã, lɑ tʋmd-n-tɑ sõngo ne b yiibã, lɑ sik-m-mengɑ b yiibã yĩngɑ, wã yaa yεl nins sẽn yaa tɩlae Lɩslaoongã dĩin pʋgẽ, la tɩlae-kãngã paasdame tɩ roagdb a yiibã yʋʋm sẽn watẽ paasdẽ, b sẽn wat n tar tʋlsem ne b biigã. la Wẽnd sagla A Gafã pʋgẽ A Naam zẽkame, tɩ b maneg b yiibã, la A keng b yiibã hakε wã zɩslem, n yeele, A Naam zẽkame:
(Fo Soabã bʋʋme : ra tũ-y zẽng sẽn pa Yẽ ye, la y maneg n tʋg roagdb a yiibã: zem tɩ yaa yembre n yaa nin-kẽem n be ne foom maa b yiibã fãa, ra wa yĩgs b yiibã, ra wa yerg b yiibã, yeel-b waoogr koεεga.*
Sik f meng b yĩnga ne yolsgo la yeele: “m Soabã yols-ba wala b sẽn wub maam tɩ m da yaa bilfã”.)
[Al’ɩsraa’ʋ 23, 24].
A leb n yeelame A Naam yɩ wagelle:
(La Tõnd sɑglɑ ninsɑɑl ne ɑ roɑgdb ɑ yiibã mɑnagre, ɑ mɑ wã zɩ-a lame ne ninbãaneg sẽn pʋg ninbãanega, lɑ ɑ yẽsengã yɑɑ yʋʋm ɑ yiib pʋgẽ: ” bɩ f soees Maam la f roɑgdb ɑ yiibã, Mɑm nengẽ lɑ y nɑ n lebg n wɑ”.)
[Al-Lʋƙmaanu 14],
Tɩ rao sok Nabiyaama, -Wẽnd pʋʋsg la A tɩlgr be a yĩnga-: “ãnd n sõmb nebã pʋgẽ ne mam tũud-n-ta sõngo?” T’a yeele:
(“Yaa fo ma wã”, t’a yeele: rẽ poorẽ yaa ãnda? Tɩ Nabiyaamã yeele: ” f ma wã”. Rẽ poorẽ t’a yeele: yaa ãnda? Tɩ Nabiyaamã yeele: ” f ba wã “) [13]
[13] Hadiisã yaa a Bʋẖaarɩ n togs-a zʋgdɑ gɑfẽ, ragnoor sẽn wĩnigd ned ning sẽn sõmba nebã pʋgẽ ne tũud-n-ta sõngo (8/2)
Woto yĩnga, maaname tɩ yaa tɩlae n rog lɩslaam, t’a tũ a roagdb a yiibã sẽn sagend-a ne bũmb ning fãa gilli, sã n ka wa n mikame tɩ Wẽnd kɩɩsgo n be beenẽ, bala wakat-kãngã, tũudum ka be ne bõn-naandga tɩ sã n yaa Naanda kɩɩsg ye, Wẽnd yeelame, A Naam zẽkame:
(lɑ b yiibã sã n pẽdg foom tɩ f lɑgem Mɑɑm ne bũmb fo sẽn kɑ tɑr ɑ bãngre, bɩ f rɑ tũ-b ye, lɑ zĩnd ne b yiibã dũni pʋgẽ ne mɑnegre)
[Al-Lʋƙmaanu 15],
Wala sẽn yaa waagib ne lɩslaam t’a waoog a roagdb a yiibã la a sik a bãgd ne-ba la a waoog b yiibã ne gomde la tʋʋma, la a waoog b yiibã ne a sẽn tõe bũmb ning fãa gill sẽn yaa manegr kõbg toor-toore, wala a sẽn na n rɩlg-ba la a yelg-ba la a tɩp-ba tɩ b sã n yaa bãad-rãmba, la a tus nang buud n yi-ba la a kos b yiibã yĩnga, la a kos yaafa n kõ-ba, la a maana b yiibã pʋlʋnga la a waoog b yiibã zao-rãmba.
nii soaba: yaa zʋg sõng maaneg ne neb a taabã:
Nabiyaamã yeelɑme Wẽnd pʋʋsg la A tɩlgr be a yĩnga:
(sɩd-kõtbã sɩd-kũun sẽn pid n yɩɩda, yaa sẽn yɩɩda ne zʋg sõngo) [14]
[14] yaa a Bʋʋ Daawʋʋd n yiis hadiisã, Sunna gaf pʋgẽ, rɑgnoor sẽn na n wĩnig tɩ “sɩd-kũun paasdame la a boogdẽ” (5/6). T’a Tirmiizi yiis-a “yẽsengã gafẽ” Rɑgnoor sẽn wĩnigd “pag hakε sẽn rog a sɩd zugu” (3/457). La a tirmiizi yeelame tɩ yaa hadiis (sẽn manege n yaa sõma). La a Albaani bʋʋdẽ: f tõe n gesa Ṣahɩɩh Abɩɩ Daawʋʋd (3/886).
La a yeele, -Wẽnd pʋʋsg la A tɩlgr be a yĩnga:
( Ad sẽn be b yãmb pʋgẽ mam sẽn bʋ nonglem n yɩɩda la neb nins sẽn pẽb ne maam ziigẽ Dũni Yikr raarã, yaa sẽn yɩɩdb zʋg sõng yãmb pʋgẽ) [15]
[15] Hadiisã yaa a Bʋẖaarɩ n togs-a (kɩtaab al-manaaƙib) zʋg waglã gafẽ, (baab) ragnoor sẽn gomd Nabiyaamã sɩfã, Wẽnd pʋʋsg la A tɩlgr be a yĩnga- (4/230) la yẽ gom-bilã yeelame (ad sẽn be yãmb sʋkẽ sẽn yaa yãmb nin-tũusdsã, yaa sẽn yɩɩd-b yãmb sʋkã ne zʋg sõngo).
la Wẽnd sɩfa A Nabiyaamã, -Wẽnd pʋʋsg la A tɩlgr be a yĩnga- n yeele:
(Ad fo bee zʋg-wagall zugu)
[Alƙalam: 4]
Tɩ a yeele, pʋʋsg la tɩlgr be a yĩnga:
(ad b tʋmsa maam tɩ m pids zʋg waglã) [16]
Rẽnd n kɩt tɩ yaa tɩlae n zao ne lɩslaama, t’a yɩ zʋg sõng soaba, ne a roagd a yiibã, n yaa manegd ne-ba, wala b sẽn togs tɩ loogã, n yɩ zʋg sõng soab ne a koambã, n yɩ wubd ne-ba wubr sẽn manege, n yɩ karen-saamb ne-ba, n wiligd-b Lɩslaoongã karengo, n zãag ne-ba n yi bũmb fãa sẽn namsd-ba Dũni kaanẽ la Yaoolem raarã, n yãkdẽ n nafd-ba a arzẽkẽ wã halɩ tɩ b wa tʋg n ta yʋʋm ningɑ b sẽn na n tik b mense, b sẽn wat n tõe n tʋm n bao b toorẽ rẽnda,
La woto bala, sẽn be zʋg sõng pʋgẽ, a sõmb n maneg a zʋgd ne a pɑgã, la a ma-biisi, la a tão pogse, la a rog-pẽtba, la a yagse la nebã fãa gilli, la a nong n rat ne a ma-biisã bũmb ning a sẽn nong n rat ne a menga, n tõkd a rogmã la a yɑgsã, n waoogd b kãsẽmba la a yolsd b bãanegã, la a yubsd yel sẽn paas a soab nenga, tɩ rẽnda yaa sẽn tʋmd ne Wẽnd koεεg sẽn yeele, A Naam zẽkame:
(lɑ y mɑneg roɑgdb ɑ yiibã lɑ rog-pẽtbɑ lɑ kɩɩbse lɑ yɑk sẽn yɑɑ rog-pẽtɑ lɑ yɑkɑ, lɑ tũud-n-tɑɑgɑ lɑ kẽn-kẽndɑ )
[Annisaa’ʋ 36].
Tɩ Nabiyaamã yeele -pʋʋsg la tɩlgr be a yĩnga-:
(ned ning sẽn kõta sɩd ne Wẽnd la Yaoolem raarã, bɩ a ra nams a yak ye) [17]
[16] Hadiisã yaa a Limaam Ahmad n togs-a a Musnadẽ wã (17/80) t’a Ahmad Šaakɩr yeele t’a tikrã manegame, t’a Bʋẖaarɩ yiis-a a adabẽ wã, t’a Bayhakɩy yiis-a Šʋ’ʿabʋ Al-ɩɩmaanã pʋgẽ, t’a haakɩm yiis-a a Mustadrakẽ wã
[17] Hadiisã yaa a Bʋẖaarɩ n yiis-a zʋgdã gɑf pʋgẽ, ragnoor ning sẽn gomd tɩ ned ning sẽn kõta sɩd ne Wẽnd laYaoolem raarã, bɩ a ra nams a yak ye: (8/13)
Wae soaba: yaa gihaadɩ zabre Wẽnd Sorã pʋgẽ, sẽn na sõng b sẽn wẽg a soaba, la sɩd la tẽeg-tɩrg sãeegre.
Wẽnd yeelame A Naam zẽk yã:
(lɑ y zɑb Wẽnd sorã pʋgẽ ne sẽn zɑbd-b ne yãmbã, lɑ y rɑ mɑɑn n zʋʋg ye, ɑd A pɑ nong mɑɑn-n-zʋʋg rãmb ye)
[Albaƙara: 190.]
la Wẽnd yeelame, A Naam yɩlg n zẽke:
(Lɑ yɑɑ bõe n tɑr yãmb tɩ y pɑ nɑ n zɑb Wẽnd sorã poorẽ, n sõng nin-vɑlmse sẽn yɑɑ roɑpɑ lɑ pɑgbɑ lɑ koɑm-bãɑnego sẽn yete: “tõnd Soɑbã, yiis tõnd tẽng-kãngã rãmb sẽn yɑɑ wẽgdbã lɑ F kõ tõnd lɑlld sẽn yi Fo nengẽ lɑ F mɑɑn tõnd sõngr sẽn yi F nengẽ”.)
[Annisaa’ʋ 75].
Rẽnd Lɩslaoongã Zabrã võorã, yaa sẽn na sɩdg sɩda, la b sãeeg tẽeg-tɩrga nebã ne taab sʋka, la b zab ne neb nins sẽn wẽgd yembsã la b namsd-ba la b gɩdgd-ba tɩ b ka tõe n tũ Wẽndã la b ka tõe n kẽ Lɩslaoongã. La yẽndã me a leb n tõdgda yam ning sẽn rat n na n modg nebã ne pãnga tɩ b kẽ Lɩslaoongã dĩin pʋgẽ wã, Wẽnd yeelame, a Naam zẽkame:
(Modgr pɑ be dĩinɑ pʋgẽ ye)
[Al-baƙara 256]
La zabrã wakatẽ, ka sõmb ne lɩslaam t’a kʋ pag ye, ka bi-bilfu, ka nin-kẽem kʋdre, la a zabda ne neb nins sẽn zabd ne zabdbã sẽn yaa wẽgdbã bala.
La ned ning b sẽn kʋ a soaba, Wẽnd Sorã pʋgẽ, yẽ soaba yaa Šahiide (dĩind zab-laagẽ kiida), a tara dargε zẽkgd Wẽnd nengẽ la keoore, Wẽnd yeelame, A Naam zẽkame:
(Rɑ tẽ tɩ b sẽn kʋ-b rãmb Wẽnd sorã poorẽ wã tɩ b yɑɑ kiidb ye, ad yɑɑ vɩtbɑ tɩ b rɩlgd-bɑ b Soɑbɑ nengẽ*
Tɩ b yɑɑ sẽn kɩdemd ne bũmb ning Wẽnd sẽn kõ-bã sẽn yɑɑ yɩɩdlmã lɑ b noogd b sũuri ne sẽn ket b poorẽ wã:” tɩ rɑbeem kɑ be ne bãmbɑ b pɑ nɑ n sãɑm b sũuri”.)
[Aal-ɭmraan: 169،170.]
Piig soaba: yaa kosgo la Wẽnd Yʋʋr tẽegre la Alkʋrãanã karẽngo:
Rẽnd sɩd-kõt sɩd-kõon sẽn paas fãa, a Loεεgã ne Wẽndã paasdame, la a kosgã ne Wẽnde, la a gãneg-m-meng n tʋg Wẽnd t’A manes a yεlã dũni kaanẽ la A yaaf a zunuub-rãmbã la a yel-wẽnsã la A zẽk a dargε-rãmba Yaoolem raarã. La ad Wẽnde, A yaa kõta, la A nongame tɩ koatbã kos-A, A tyeelɑme A Naam yɩlegyã.
(lɑ Mɑm yembsã sã n sok foo Mɑm yelle, rẽnd Mɑm pẽeme, M deegdɑ boɑand boolgo, t’ɑ sã n bool-Mɑ)
[Al-baƙara 186]
Rẽnd wẽnd reegda kosgo tɩ sã n mikame tɩ yaa sõma ne yamba, la A leb n kõ yambã yel-sõmde ɑ kosgã yĩngɑ.
La woto bala, sẽn be sɩd-kõtbã sɩf-rãmbẽ, yaa Wẽnd Yʋʋrã tẽegr wʋsgre yʋndo la wĩndga, sẽn solg la sẽn vẽnege. Rẽnd a zɩsgda Wẽnde A Naam zẽkyã, ne zɩsgr kõbg toor-toore, Wẽnd yʋʋrã tẽegre, wala a sẽn yete (Sʋbhaana-llaah) Yɩlgr be ne wẽnde, (Al-hamdʋ Lɩllaah) Pẽgr be ne wẽnde, (Wa Laa’ɩlaaha ɩllallaah) lɑ soab ka be tɩ sã n ka wẽnde, (Allaahʋ Akbar) Wẽnd n yɩɩd ne bedrem, la zẽng sẽn ka rẽnda sẽn yaa Wẽnd Yʋʋrã tẽegr kõbg toor-toore. La ad wẽnd maana keoor sẽn yaa bedre ne yel-kãngã, A Naam zẽkame:Tẽn-tʋʋmã yeelɑme, Wẽnd pʋʋsg la A tɩlgr be a yĩnga:
(“Ad sẽn welg n yaa b yembr rãmbã põsame”, tɩ b yeele: “yaa ãnda rãmb la sẽn welg n yaa b yembr rãmbã foom Wẽnd Tẽn-tʋʋma?” La a yeel-yã “Ad yã sẽn tẽegd-b Wẽnd Yʋʋrã wʋsgã sẽn yɑɑ raop la pagba) [18]
A leb n yeelame A Naam yɩ wagelle:
(Yaa yãmb a kõ sɩdɑ! Tẽeg-y Wẽnd tẽegr sẽn wɑooge.*
Lɑ y yɩlg-A yibeoog lɑ zɑɑbre.) [Al-Ahzaabʋ 41,42] la A leb n yeelem A Naam yɩlgame: (bɩ y tẽeg M Yʋʋrã tɩ M nɑ tẽeg y yelle, lɑ y pʋʋs Mɑɑm bɑrk lɑ y rɑ mɑɑn Sõm-zɩtm ne Mɑɑm ye)
[Al-baƙara 152]
La sẽn be Wẽnd Yʋʋrã tẽegrẽ, yaa Wẽnd Gafã karengo -Alkʋrãan Wagallã- rẽnd yamb sẽn wʋsg Alkʋrãanã kareng fãa la a tags-ɑ n ges sõma, la a dargε wã sẽn paasd zẽkr Wẽnd nengẽ.
[18] Hadiisã yaa a Muslim n yiis-a Wẽnd Yʋʋrã tẽegre la kosgã gafẽ, (baab) ragnoor ning sẽn pirsd tɩ b tẽeg Wẽnd Yʋʋrã (17/4).
B yeta Alkʋrãan wɑgellã karemda Yikrã Raare:
(Karem la f rʋʋge la f tũnugdẽ, la f zodgdẽ wala fo sẽn da yɩ n zodgd dũni wã, tɩ ad fo sigib zĩigẽ yaa fo karengã sẽn wa n tʋg n tek Aayar ninga) [19]
[19] A Abʋʋ Daawʋʋd n togs-a (1464), la yaa yẽ sẽn togs gom-biis ninsã la woto. La a Tirmiizi (2914) la Annasaa’ɩy Sunan Alkʋbraa wã pʋgẽ (8056) la a Ahmad (6799).
Piig la a yembr soaba: Yaa Šari wã bãngr karengo la karem-a nebã la wilg-a nebã la bool n tog-a
Wẽnd pʋʋsg la A tɩlgr be a yĩnga- yeelame:
(Ned ning sẽn tuka sor n baood bãngr a pʋgẽ, Wẽnd yolsda sor ne-a n tʋg arzãna, la ad malεgsã gãnegda b pɩgsã bãng baood yĩnga, tɩ yaa yɑrdo ne ɑ sẽn mɑɑndã. [20]
[20] Hadiisã yaa a Tirmiizi n togs-a, ragnoor ning sẽn gomd fɑseng yɩɩdlem tũudumã pʋgẽ (4/153). La a Abʋʋ Daawʋʋd, bãngrã gafẽ, ragnoor sẽn gomd pirsgu bãngr baoobẽ (4/5857). La a ɭbn Maagε, a gafã tɩʋʋsgẽ (1/81). T’a Albaani yeel t’a manegame a Ṣahɩɩh Al-gεεmɩ’ʿa pʋgẽ (5/302)
La a yeele, Wẽnd pʋʋsg la A tɩlgr be a yĩnga:
(Yãmb sẽn yɩɩd sõblem, yaa ned ning sẽn karema Alkʋrãanã la a wilg-a) [21]
La a yeele, Wẽnd pʋʋsg la A tɩlgr be a yĩnga:
(Ad malεgsã kota yel-sõmde n kõt ned ning sẽn karemda nebã bõn-sõngã) [22]
La a yeele, Wẽnd pʋʋsg la A tɩlgr be a yĩnga:
(Ned ning sẽn boola n tʋg kãndagrẽ, a tara ned ning sẽn tʋma ne-a wã keoorã buudu, tɩ bãmb keoorã ka boodg baa bilf ye) [13]
[21] Hadiisã yaa a Bʋẖaarɩ n togs-a (kɩtaab al-fadaa’ɩl),yɩɩdlmã gɑfẽ (baab) ragnoor sẽn wĩnigd “Yãmb sẽn yɩɩdɑ sõblem, yaa ned ning sẽn karema Alkʋrãanã la a wilg-a” (6/236)
[22] Hadiisã yaa a Tirmiizi n togs-a (kɩtaab al-ɩlmi) bãgrã gɑfẽ, (baab) ragnoor sẽn wĩnigd ” Dĩinɑ fɑseng sẽn yɩɩd tũudumã (5/50) lɑ gomdã togsgã woglem yɩɩdɑ woto
[23] yaa a Muslim n yiis-a (kɩtaan al-ɩlmi), baab, ragnoor ning sẽn gomd ned sẽn tuk so-sõngo maa so-wẽnga (16/227)
A leb n yeelame A Naam yɩleg yã:
(Ãnda koεεg manegr n yɩɩd ned ning sẽn boola n tʋg Wẽnde la a tʋm sẽn sõmbe, la a yeele: “:ad mam lagma moeembã” ?)
[Fʋ̌̌ṣṣɩlat 33]
Piig la a yiib soaba: yaa f yard ne Wẽnd la A Tẽn-tʋʋmã Bʋʋdo:
Yẽ yaa f ra wa tõdg yelle, Wẽnd sẽn maan-a t’a yaa Šari ye, bala Wẽnde, A Naam Yîlg-yã, Yẽnd n yɩɩd bʋʋdbã fãa gilli ne Bʋ-sõngo, Yẽ n yɩɩd Yolsdbã fãa gilli ne yolsgo, bũmb ka solgd-A tẽngã poorẽ maa saasẽ wã ye, la Bʋʋdã me ka bũmb sẽn kẽed ne yembsã yõor yamleoodo la modgdbã tẽedbã ye. La sẽn be A yolsgã pʋgẽ, yaa A sẽn maan Šari wã n kõ A yembsã, tɩ b dũni la b Yaoolem raar manegr be a pʋgẽ, la A leb ka rogend-ba b sẽn ka tõe ye. La sẽn be sak-n-yɩ yemb ne-A wã pʋgẽ, yaa f sẽn na n bʋ ne Wẽnd Šari wã yel fãa pʋgẽ, n lagem ne sũurã fãa yard ne rẽ.
Wẽnd yeelame A Naam zẽk yã:
(Lɑ pɑ boto ye, M wẽen ne fo Soɑbã, b pɑ kõt sɩdɑ hɑl tɩ b wɑ mɑɑn foo b bʋʋdã yεl nins sẽn kẽed bãmb ne tɑɑbɑ sʋkɑ, rẽ poorẽ tɩ b pɑ tɑr keoog fo sẽn bʋ wã pʋgẽ ye, lɑ b bɑs b mense n tũ tũub tεkẽ)
[Annisaa’ʋ 65].
A leb n yeelame A Naam yɩ yɩlegyã:
(pɑ zɩɩlemã bʋʋd lɑ b rɑt lɑa, lɑ ãnd bʋʋd sõmblem n yɩɩd Wẽnde, lɑ yɑmã rãmbɑ n mi rẽ)
[Al-Maa’ɩda 50].
About The Author
