Hunorde

En fuɗɗorii Innde Alla, Huuɓuɗo yurmeeende, Heerorɗo yurmeende

Denndaangal yettooje ɗen woodanii Allah, hiɗen yetta Mo, hiɗen wallinora Mo, hiɗen insinoo e Makko, mooloren Mo boneeji pitaali men, e bonɗi golle men. Kala mo Allah fewni, ko on woni feewuɗo on; kala kadi mo O majjini, a heɓantaa on giɗo ɗowoowo. Mi seedike wonnde reweteeɗo tanaa Allaahu alaa, e wonnde Muhammadu ko jeyaaɗo Makko e Nulaaɗo Makko. Yo Allah juulu e makko O hisna mo kisal ɗuuɗungal.

Si ɗum feƴƴii:

Hiɗen hanndi fewndo hannde, e wallifannde newiinde ñoggaa, weeɓitiraynde diina Lislaamu kan no ka moftiri. Foti ko ko yowondiri e fiɓnde, maa dewe, maa gollodal, maa neediijii e ko wanaa ɗum.

Hara janngoowo nden wallifannde, hino waawi heɓude miijo ɓanngungo huuɓitungo fii diina Lislaamu. Naatoowo diina kadi heɓa e mayre ruttorde aranere fii anndinagol ñaawooje e neediiji, yamiraaɗi e haɗaaɗi. Nden wallifannde wona e juuɗe noddanooɓe Allah, nde nantinee e ɗemɗe ɗen fow, nde henndinee kala lamndotooɗo fii diina Lislaam e kala naatoowo e diina kan. Kala mo Allah muuyani feewugol, feewira nde, nde wona daliila yottagol e yimɓe ooñiiɓe e majjuɓe.jj

Ado fuɗɗagol deftere nden, ko maa waɗa laawi e doɓtanɗe ɗe ballifo on rewata e mun, fii no faandaare mayre on newora hewtugol. Hino jeyaa e ɗen ɗate:

Weeɓitirgol kaa diina, immorde e nassuuji Alqur’aana e Sunna, hara wanaa e ko eggaa e yimɓe, maa ɗate falsafayankooje fii henangol jamaa on. Ɗum le ko fii piiji buy:

a- tawde si haala Allah kan nanaanma, fanndaarene Makko nden gelaama, kala mo O muuyani peewal feeway ontuma, hujja on ñiiɓa e majjuɓe saliiɓe ɓen, wano Allah daaliri non:

“Si gooto e sirkooɓe ɓen hoɗdaniima ma hoɗtu mbo, haa o nana daalol Allah ngol, refti yottinaa mo nokku hoolaare makko nden”.

[At-Tawbah : 6]

Hino hasii ka hujja ronka ñiiɓirde eggaaɗe e yimɓe ɓen maa ɗate falsafayankooɓe jilluɗe ustaare e palje.

b- tawde Allah yamirii en yottinirgol diina Makko kan e wahayu on no jippori non,O yamiraa en sincugol ɗate falsafa ko fewniren yimɓe ɓen, sikken en battiniray ɗum e maɓɓe. Ko fii honɗum himmirten ko en yamiraaka, tertoɗen ko yamiraɗen kon?

c- tawde kadi ɗeya ɗate noddirɗe e diina, wano yewtugol yaacna fii ooñanɗe lunndiiɓe ɓen, rutta ɓe; foti ka fiɓnde, maa ka dewe, maa ka jikkuuji, maa ka neediiji, maa ka faggudu maa huutorgol wennje miijo; wano yawtugol fii tabintinnde woodeede Allah – O toowii e ko tooñuɓe ɓen wi’ata Mo – maa yewtugol fii ko waylaa kon ka Linjiila e ka tawreeta e ɗeya Defte diina, ɓanngina ko ɗuytaa e ko bonnaa e majje,

ɗum fow hino gasa wonnde naatirɗe ɓannginirgol piɓe bonɗe lunndiiɓe ɓen, hino gasa wonnde kadi njooɓa pinal juulɗo -e hoore non o lorotaako e waaseede anndude ɗum – Kono ɗum waawaa wonnde tuuginorde e fokkitannde nde noddirgol fjaade Allah darato.

d- tawde kala naatirooɓe lislaamu e ɗee ɗate yawtuɗe, wanaa tun hara ɓen ko juulɓe tigiri. Goɗɗo no naatira e kaa diina sabu weleede mo huunde heeriinde nde o fensitanaa, hara non o gomɗinaa piiji goo e diina kan; ɗum ko wano weleteeɗo fii heeroriiɗi faggudu Islaamu ndun, kono hara ontigi gomɗinaa fii laakara, maa hara o gomɗinaa woodeede jinna e seytaane ekw.

Sugu ɓen yimɓe, lorra maɓɓe on e Lislaam, hino ɓuri nafa maɓɓe kan.

e- tawde Alqur’aana hino battina e pittaali e ɓerɗe. Si feere accaa hakkunde mayre e majje, pittaali laaɓuɗi ɗin noototo nde, ɗi toowira ƴanɗe gomɗinal e gomɗal. Ko fii honɗum heedaten hakkunde mayre e majje?

Wata jaaɓondiral, maa tippugol e ko fewndii, maa laawi yawtuɗi naatu e fii weetitugol kaa diina. Yo ka weeɓitire no ka jippori non, jokka ɗum e laawol makka on ka yewtugol yimɓe ɓen, yaarana ɓe doy-doy e ñiiɓal ngal.

Hino habboraa wallifannde nden newagol binndol, e ñoggugol fotde baawɗe, fii no nde newora yooɓagol hakkunde yimɓe ɓen.

Si en yeɗaama gaynugol ɗee golle, en muulii nde egganɗe ujune sappo mjiliyon, ɗen hewtii e juuɗe ujune sappo yimɓe, gooto e teemedere maɓɓe tun gomɗina Aayeeje e Hadiiseeje mayre, ko heddii kon yedda ɗum. Kono nden wootere e teemedere nden fewtita en hino yaccoo hino yankinii, hino ɗaɓɓa gomɗinal e gomɗal, kori hiɗa anndi, an musiɗɗo tedduɗo, wonnde ɓen ɗon hino holli naatugol yimɓe ujunere teemedere ka diina Lislaamu?

Ɗum ɗon non, sikke alaa wonnde ko golle mawɗe. Tawde ko nde Allah fewnirta gorko gooto sabu maa, ɓuri moƴƴannde ma e diini gelooɗi boɗeeji ɗin.

Wurin hay si gooto e ɓen noddaaɓe nootaaki, ɓe fow fow ɓe ɗuurnike diina kan, haray enen en tottii hoolaare nden, en yottinii kadi nulal ngal Allah nuli en ngal yottingol.

Himme noddanooɓe Allah ɓen, wanaa bee tun no yimɓe ɓen yaniranee fii diina kan, maa wano Alqur’aana jooporii fii rerɗingol e peewal maɓɓe:

“Si a rerɗii e peewal maɓɓe, [anndu] pellet, Allah fewnataa on Mo o majjini”.

[An-Nahl: 37].

Himme maɓɓe ko haani wonnde, ko ko Annabiijo maɓɓe jom kisiyee on himmirnoo kon, mo jom mun daalani :

“Ko an yo Nulaaɗo, yottin ko Jippinaa kon e maaɗa immorde ka Joomi maa, si a waɗaali, haray a yottinaali nulal Makko ngal. Allah ko daɗndoowo ma e yimɓe ɓen.”

j[Al Maa’ida: 67].

jHiɗen toroo Allah nde woneten en fow men, wallindirooɓe e yottingol diina Makko kan faade e yimɓe ɓen fow, e nde O waɗata en wallitorɓe moƴƴere, noddanooɓe nde, salotooɓe sakkoo bone. Ko Allah ɓuri anndude. Yo O juulu e Annabiijo men on Muhammadu.

About The Author